Элстд танһчин техникүдин марһан төгсв

Элст балһснд кегдлмүд кедг уйн наста көвүд-күүкдин, техникүдин болн рационализаторин танһчин марһан төгсв. Энүнд мана региона цуг райодын сурһульчнр болн оютнр орлцв.

Яшалтан района элч арвн хойр наста Анастасия Тетерина марһанд компрессор үзүлв. Энүг күүкн дөрвн өдрин туршарт кев. Энүнә төлә шишлн литератур умшад, интернетд кесг соньн материал цуглулж авв. Дәкәд болхла, Настя техническ кружокд одна. Энүнд күүкн талдан бичкдүдлә хамдан кесг соньн тоот кеж һарв. Күүкнә үүдәсн компрессорар машина мотор дотр ямаран дарлт бәәхнь медж болжана. Настяд эн керг йир таасгдна. Тер мет талдан улсин тоолврар, эн кергәр зуг көвүд соньмсна.

Анастасия Тетерина келсәр, эн компрессор йир үнтә, би болхла энүг эврә һарарн кеж чадв.

Яшалтан района талдан сурһульчнр Андрей Шрамоко болн Дмитрий Иванов газосварочн аппарат кев. Эн аппаратын нилчәр төмрәс кесн юмиг керчж болжана. Нег үлү энүг гер бодт олзлж болжана. Эднә багш Владимир Ивановин келсәр, жил ирвәс көвүд эн кергәр улмсоньмсж йовна. Келхд, Яшалатан района сурһульчнр тиим марһанд түрүн диилвр бәрв.

Владимир Ивановин келсәр, көвүд тиим олз-туста кергәр соньмсчахнь йир сән. Эдн кружокд дамшлтан өөдлүлнә.

Олн-зүсн инструментиг жюрин гешүд үнлв. Бичкдүдин үүдәлтин цутхлнгин директор Ирина Очирован келсәр, тиим марһан бичкдүдт дашлт өгнә, энүнә йовудт көвүд-күүкд эврәннь көдлмшән үзүлсн деерән, талдан орлцачнрин кесн кегдлмүд үзж чаджана.

Ирина Очирован келсәр, өдгә цагт техническ номар бичкдүд икәр соньмсжахш. Тегәд эн марһана орлцачнрт урмд өгәд, дөнгх кергтә.

Дииләчнр болн призермуд дипломсар ачлгдв.

Ээнән Дельгр, Очра Сергей