Аршанд бәәцин төриг яһж хаһлхмб?

Бәәцин төриг яһж хаһлхмб? Эн халхар Элст балһснас холл биш бәәх Аршан селәнә 15-гч тойгта школын һардачнр эврә арһан олж үүлджәнә. Урднь бичкдүдин гер бәәсн бәәриг ясад, эврәннь багшнртан, талдан халхин көдләчнртән олзлхд өгчәнә.

Өрүн болһн өдрән эдн субботникар эклнә. Эннь байрта йовдл гиж эдн тоолжана, юнгад гихлә эврә бәәх бәәрән ясна гидг тааста, таалмжта юмн болжана. Дәкәд болхлаг эн өдрмүдт зогсчах дулан тенгрин бәәдл эднд улм ик урмд өгчәнә. Бичкдүдин гер хаагдсна хөөн эн бәәрн эзн уга зогсчасмн. Тегәд школын һардачнр ухалад, кергтә кевәр олзлх седкл зүүсмн. Эн олзта-туста йовдлын тускар, кенә дөнг-нөкдәр эн сән чинртә керг-үүлдвр күцәгджәхин тускар школын директор Любовь Мушанова келж өгв.

Школын замч Роза Петровна Калмакова эврә көвүтәһән кесг жилдән эк-эцктәһән бәәдг бәәсн. Салу бәәх санан дангинд ордг, зуг арһ уга бәәсмн. Ода болхла эврә хораһан ясчана. Бәәрн эврә эс болвчн муниципальн медлд орна. Тегәд бидн зуг коммунальн халхин туслмжиг даахвдн гиж Роза Петровна байртаһар келнә.

Эндр өдр ясгдсн бәәрнд зурһан өрк-бүл нүүж орсн бәәнә. Ясврин көдлмш зуг нег халхднь кегдсн бәәнә, уд луга цааадан ясгдх зура бәәнә. Хораст эдектрокүчн орулгдсмн, уд луга дула оруллһна систем углж тәвгдхмн. Иим йовдл багшнрт талдан чигн халхин көдләчнрт һол кергән улм сәәнәр күцәх урмд өгдг болжана.

Аршан селәнә 15-гч дундын школ сән чинртә школын нер зөвтә кевәр зүүжәнә. Эн школд хам-хош бәәх Лола, Максимовка селәдин бичкдүд бас сурна. Школын бас нег төр хаһлгдв. Эдн эврә шин автобуста болв. Хоша бәәх селәдин күүкд-көвүд Урдк жилмүдт школдан йовһар ирдг бәәсн болхла, ода эдн автобусар зөөгднә. Эк-эцкнрнь, багшнрнь чигн ола санамр бәәцхәнә.

Ивахненко Дмитрий, Очра Сергей