Элстд келмнрчнрин марһан болв
Элст балһснд орн нутгин түрүн баһ наста келмнрчнрин марһан эврәннь көдлмшән эклв. Эн керг үүлдврт 40 һар күүкд көвүд орлцв. Марһанд Элст балһсна школмудын 5гч-6гч классмудын сурһульчнр өдгә цагин болн һазадын орн нутгудын бичәчнрин үүдәвмүд чеежәр дасч марһлджана.
Эн марһанд орлцхар школ болһнаас йилһән сәәнәр чеежәр шүлг келдг күүкд болн көвүд орлцв. Тәәз деерәс өдгә цагин болн һазадын орн нутгудын бичәчнрин үүдәвмүд жүрин гешүд болн ирсн улс сонсчана. Нертә бичәчнрин бичсн үүдәвмүд чеежәр келх амр биш, дәкәд болхлаг нааран эдниг хәләхәр олн улс ирв.
11 наста Шургина Игорь бийән сән кевәр бәрв. Иим марһаст дангин орлцна. Эндр өдр жүрин гешүдт нертә орс бичәчин Александр Пушкина «Дубровский» нертә үүдәвр чеежәр келж өгв.
Нанд Александр Пушкина бичсн шүлгүд йир таасгдна. Орс бичәч хальмгудын тускар дангин бүләнәр халунар бичлә. Эн бичәч хальмг улс йир дурта бәәсмн.
Баһ наста билгтнрлә эн өдр энүнә үүрмүднь ирсн билә. Цаһана Кензеева болн Анастасия Бондарева Константин Паустовский орс бичәчин үүдәсн «Көгшн замч» болн Грим ахнрин шүлгүд чеежәр келж өгв. Эднә багш Раиса Алджееван келсәр эндр өдр мана баһчуд дегтр умшхдан дурлхш. Бичкн цагасн авн бичкн бичкнәр шүлгүд дасхла цааранднь эдн өсхләрн ут шүлгүд дасх. Раиса Алджеева «Парус» нерәдллһтә студин һардач болжана, эн студьт көвүд күүкд ирж олн зүсн керг күцәнә. Эврәннь билг эрдмән үзүлсн деерән хоорндан таньлдж, сүв селвгәрн хувалцна, таасгдсн төрмүдән күүндвр тогтана.
Келмнрчнрин марһана бүрдәһәчнрин келсәр хамгин түрүнд эн керг үүлдврин һол күсл эннь; эндр өдр дорас өсч йовх бичкдүд дегтр умштха гисн ицлтәһәр бидн эн керг үүлдврән бүрдәвидн.
Жүрин гешүдин ашар йилһән сәәнәр, айслулж келсн көвүд күүкд диилвр бәрв.
Элст балһсна эрдм сурһулин әнгин специалист Нина Малиеван келсәр бичкдүд эн керг үүлдврт шунмһа кевәр орлцв, хамгин түрүнд эднә багшнрт болн эк эцкнрт ханлтан өргх кергтә.
Келхд, эн марһанд диилвр бәрсн көвүд күүкд мана Танһчиг эн жилин июнь сарин нег шинд болх цуг Әрәсән марһанд эврәннь билг эрдмән үзүлх.
Энән Делгр, Владислав Бадмаран
