Элст балһснд танһчин нертә сойлын үүлдәчнр бәәсн герт мемориальн самбр секгдв

Элст балһснд Хальмг танһчин нертә сойлын болн искусствин үүлдәчнр бәәршлжәсн Очра Номтын нертә уульнцин герт мемориальн самбр байрин бәәдлд секгдв. Энүнд хальмгин ууһн композиор, нертә биич Эмба Манджиевин, актрис Уляш Наркаеван болн нань чигн тоомсрта улсин санл тодлгдв.

Мемориальн самбр секлһнә керг-үүлдвр хуучн нәәжнрин харһлтд хүврү. Эн барак давн зун жилин тәвдгч жилмүдт хальмгуд Сиврәс нүүж ирсн хөөн тосхгдсмн. Тиигхд эн герт мана танһчин сойлын болн искусствин үүлдчнр бәәршлв.

Тер жилмүдт эн баракд бәәсн әмтн ни-негн, нег-негндән нөкд болж бәәдг билә гиж Валентина Чотлаевна невчк уйдвртаһар тодлна. Валентина Арсановала хам-хоша бәәсн Эмма Манджиевад эн гүрин тускар бас тодлх юмн дала.

Тер цагт бәәцин таал уга болв чигн, энд кесг жилдән мана нертә биич Эмба болн Эмма Манджиевихн ба цагтан бәәсмн. Эмма Номтыновна тодлсар, эднлә хам-хош бәәсн Петр Чонкушов ке-сәәхн ду Элстин вальс үүдәсмн. Эн дууг ода күртл олн улс дуулад, ен сергмж авч, Элст балһсарн бахмж кежәнә.

Элст балһсна бииһин болн дууһин ансамбльмудын соньн концертин хөөн, баракд тәвдчг жилмүдт бәәсн әмтн мемориальн самбр секв. Энүнд хальмгин сойлын нертә үүлдәчнрин нерд бичәтә. Мемориальн самбрт бичәтә танһчин билгтә улсин нердиг дорас өсж йовх баһчуд сәәнәр тодлж авч күндлх.

Азыда Надежда, Бадмаран Владислав