Элст балһсна 2-гч тойгта школд санлын өдр болв

Шидр мана орн-нутгт төрскән харсгч дәәнә санлын өдр болв. Энүнд нерәдгдсн кесг керг-үүлдврмүд давулгдсн билә. Тиим нег үүлдвр Элст балһсна 2-гч тойгта школд давв.

Далн негн жил хооран төрскән харсгч дән эклсмн. Дөчн негдгч жилин июнин хөрн хойрла өрүн дөрвн часла фашистк Германь зар угаһар генткн Советск Союзд дәврәд орсмн. Дәәнә түрүн өдр мана орн-нутгин олн селәд-балһсд, төмр хаалһст, аэродромст бомб хайгдв. Немшин церг СССР-ин межә һатлад, мана орн-нутгин аһу эзлхәр дәврлһ кесмн. Иим кевәр төрскән харсгч дән эклв. Хальмг танһчин аһуд сүркә дәәлдән Яшкульск района Хулхт селәнә өөр болв. Хөрн нәәмдгч әәрмин баатр-зөрмг салдснр немшнриг мана танһчин һазрас көөһәд, Хальмг танһч сулдхсмн. Од амадн эүннә тускар мартх зөв угавидн. Төрскән харсад, әмнәсн хаһцсн улсин санл тодлхин төлә цуг сурһулин заведеньст көвүд-күүкд тер һашута цагин тускар келж өгнә. Элст балһсна 2-гч тойгта школд эн дәәнд нерәдгдсн музей бәәнә. Эн нәәмн жил хооран Татьяна Петровна Пугачеван нилчәр бүрдәгдсн билә. Жил болһн июнь сарин хөрн хойрла көвүд-күүкдт баатр-зөрмг кевәр дәәлдсн салдсмудын тускар музейн һардач келж өгнә.

Онц оньг эн школ төгсәсн дәәнә ветеранмудт тусхагджана. Дөчн негдгч жилд дундын сурһуль чиләсн баһчуд эврә дурар дәәнд одад, төрскән харсв. Дөчн хойрдгч жилин август сард немшнр Элст балһс эзлсмн. Эн школын герт немшнр госпиталь кев. Сурһуль хаагдв. Тавн сар болад Советск Союзин церг Элст балһс сулдхв. Элстәс һарч йовад, немшнр цуг гермүдиг шатаж. Хойрдгч школын гер бас шатв.

Келхд, 2-гч тойгта школын көвүд хәәврин отрядт көдлжәнә. Эдн Хулхт селәнә өөр күцәгджәх хәәврин көдмшт дангин орлцна. Эднә олж авсн олн-зүсн сумн болн дәәнә талдан чигн тоот ода музейин экспонатмуд болв. Тегәд дорас өсч йовх баһчуд төрскн һазрин туужиг хадһлж йовна гиж келхлә буру болшго.

Шаран Баира, Котина Валерий