Амрлһна өдрмүдт Элст балһсна баһчуд эрәннь сән өдрән темдглв
Амрлһна өдрмүдт Элст балһсна баһчуд эрәннь сән өдрән темдглв. Баһчуд «Время действовать» нертә легкоатлетическ кросст орлцв. Эн керг үүлдврт күн болһн орлцж чадв. Кроссин орлцачнр «Пагода семи дней» цутхлн талвнгас диилврин талвн күртл гүүв. Дәкәд болхла эн өдр инвалидмүдин дунд бас спартакиад бүрдәгдсн билә.
Жил болһн Әрәсән баһчудын өдр июнь сарин хөрн доланд темдглнә. Хальмг Танһчин баһчуд эн амрллһна өдрмүдт эн өдрән темдглсн билә. Давсн амрллһна өдрмүдт Диилврин талвнгд болсн керг үүлдврмүдт ик бичкн уга орлцв. Бичкдүд нег часин эргцд «Яркий мир Детства» нерәдллһтә марһанд олн зүсн өнгтә церд авад ке сәәхн зургуд зурсн билә. Эн керг үүлдврт орлцхар кесг бичкдүд ирв. Эн марһанд орлцсн цуг бичкдүдт бичкн белгүд һартнь бәрүлж өггдсн билә.
Эн керг үүлдврт хамгин һол оньг инвалидмүдт тусхагдсн билә. Эднә хоорнд спартакиад болв, спартакиадт орлцсн цуг көвүд күүкд бас үнтә белгүдәр ачлгдсн билә.
Эк Гагарина Наталья эн өдр йир байрта билә, тер юнгад гихлә эднә мөтату бичкдүд эрүл менд бичкдүдлә хамдан олн зүсн марһаст орлцад диилвр бәрв. Олн зүсн гем шалтгта улсиг нааран авч ирх күнд болна. Эднлә тренермүд олн зүсн керг үүлдвр күцәнә, иим харһлтс эдниг дангин байрлна.
Гагарина Натальян күүкн арвн зурһата. Эндр өдр Алена күүкн гемтә болв чигн олн зүсн марһаст орлцад диилв бәрнә. Сүл цагт Алена дартс спортар соньмсдг болв.
Күнд болв чигн би дангин иим марһаст орлцхар седнәв. Эн спортд би жил хооран ирләв. Эн керг үүлдврин орлцач Сатан Лана арвн хойрта. Сүл цагт эн баһ наста күүкд күн шатрар соньмсдг болв.
Сатан Ланан келсәр шатр наадхларн үүрмүдлә харһх саам учрна. Зунын кемлә мини үүрмүд амрллһндан йовсн билә, би болхла нааран ирәд цагагн соньн кевәр давуллав. Эн өдрмүдт лана шатрин марһанд белдв кежәнә, негдгч орм шүүж авхар саната.
Мөч тату улсин хоорнд болсн спартакиадт Сатан Лана негдго эзлв. Дәкәд эн керг үүлдврин йовудт гем шалтгта бичкдүд эврә һарарн кесн кегдлмүдән нааран авч ирәд хулдв. Баһчудын сән өдрт нерәдгдсн байрт олн улс армреслинг, гирин, резин һосн хайлһна спортд болн нань чигн соньн керг үүлдврмүдт орлцад цаган олз тустаһар давулсн билә. Орлцсн баһчудт легкоатлетическ кросс йир күнд болв гиж келхлә буру болшго. Тер өдр баһчуд “Пагода семи дней” талвнгас диилврин талвн күртл гүүсн билә.
Гүүх йир күнд болв.ямаран ормд ирсн би медхшв. Спортд би дуртав. Бичкн цагасн авн олн зүсн спортивн марһаст дангин орлцнав гиж көвүд келв.
Келхд, легкоатлетическ кросс тут тоодан хойр зун тәвн негн күн орлцв. Хамгин бичкн көвүн зурһан таста билә. Диилвр бәрсн баһчудыг халун хотар тоов. hан халун болсн өдрлә бачм дөн күргд цутхлгин эмчнр бас эврә дөн нөкдән күргсн билә. Асхар диилврин талвгд хурсн улсин болн диилвр бәрсн баһчудын төлә балһсна үүдәгч коллективс эврә билг эрдмән үзүлсн билә. Хальмг Танһчин спортын болн туризмин министр Алексей Пахаленко эн өдр нааран ирсн цуг баһчудыг йөрәһәд олн зүсн халхасн күцәмж дурдв.
Хальмгин Танhчин көвүд күүкд әрәсән баһчудын өдрән байрта кевәр давулв. Бүкл жилдән хальмг танһчин министерствин специалистр баһчудын төлә олн зүсн марһас бүрдәх саната.
Гүзәлән Татьяна, Хавтхна Элла
