Элст балһснд бичәч Эрнжәнә Константина зун жилин өөнд нерәдгдсн шүлгләнә асхн болв
Тадн танһчин зәнг шуд эфирт хәләжәнәт. Һарцан цаарандан өгчәнәвидн. Элст балһснд бичәч Эрнжәнә Константина зун жилин өөнд нерәдгдсн шүлгләнә асхн болв. Бичәчин онта өөниг мана танһч иргч жилд өргнәр темдглх. Болв белдврин көдлмш оданас авн эклжәнә. Элстин арвн доладгч школд болсн харһлтын йовудт Эрнжәнә Константина үүдәврмүдиг сурһульчнр умшад, цуглрсн улсиг байрлулв. Мана зәнгч Ээнән Ольга нертә шүлгчин үүдәврмүд сонсад, чикнә хужран ханһав.
Арвн доладгч школын сурһульч Андрей Джушхиновин тоолврар, бичәч Эрнжәнә Константина үүдәлтиг школьн программас меднә. Болв Художесьтвенно слово кружокт орлцад, бичәчин тускар медж авв. Эрнжәнә Константин хальмг улсин амн үгин зөөриг сәәнәр меддг күн бәәж. Энүнә бичсн үүдәврмүд мана бәәдл-жирһләс авгдж. Энүнә тускар көвүнд багшнр келж өгв. Школьн кружокт нег сардан оржана. Энүнд литературт дурта улс орна. Баһчуд шүлгүд бичж, билг-эрдмән делгрүлнә гиж Андрей келв. Эн өдр сурһульчнр бичәч Эрнжәнә Константина хамгин сән үүдәврмүд умшж, цуглрсн улсиг байрлулв. Шаги по огненным тюльпанам, Старый тополь, Казанок болн нань чигн үүдәврмүдиг бичкдүд Эрнжәнә Константина өөрхн улст болн нәәжмнр умшж өгв. Уйн наста билгтрин келсәр, тоомсрта бичәчин үүдхврмүд умшхла, гүн уха тунһах кергтә болна. Художественное слово нертә кружокин һардач Валентина Арсанован келсәр, Эрнжәнә Константина үүдәврмүд дорас өсж йовх баһчудт шагшавдын болн төрскнч сурһмж өгнә. Кружокин кичлд эдн бичәчин үүдәврмүдәр наад тәвнә. Иим кеәвр эдн сурһульчнрт мана танһчин билгтә үүдәврмүдлә таньлдулж, сананднь күргх зурата. Эрнжәнә Константина шүлгүд у-өргн хальмг теегт нерәдв. Бичәч хальмг улсин уул авг бәрциг йир сәәнәр меддг бәәсмн. Энүнә бичсн дегтрмүдт мана бәәдл-жирһл дегд сәәнәр үзүлгджәнә. Эрнжәнә Константина үүдәврмүд Хальмгин литературин алтн көрнг болж үлдх. Алтн булг нертә дегтрт бичәч хальмг улсин уул зангшалын тускар тодрхаһар бичв. Эн дегтр дорас өсж йовх баһчудт олз-туста болхнь лавта. Тер мет энүнә үүдәсн , алан хадһл, Анһучин көвүн, Хөөчин дун нертә дегтрмүдиг олн үйнр умшж, гүн медрл авх.
Ээнән Делгр Жамбин Дмитрий
