Элст балһснд әмтн бәәдг гермүд дегд үнтә
Өдгә цагт Элст балһсна олн әмтн бәәдг гер хулдж авч чаджахш. Юнгад гихлә, ода иим гермүд йир үнтә болжана. Жил ирвәс улсин ору икдәд йовв чигн, гермүдин үн дегд түргәр өсжәнә.
Гиляна Харашкина эврәннь авальтаһан болн күсдундур наста Аюка көвүтәһән ода эк-эцкнриннь герт бәәнә. Иим кевәр өдгә цагт баһ наста олн өрк-бүлмүд бәәршлжәнә. Дәкәд үр һарһх санан бәәнә, зуг эврә гер уга болжана гиж Элстин күүкд күн келнә. Эврә патьр хулдж авхд дегд үнтә болжана, эннь күцгдшго төр болжана. Гиляна Харашкина келсәр, салу гер бәәсн болхла сән болх билә. Болв патьр ода дегд үнтә. Жалв болхла йир бичкн болжана.
Ода Элст балһснд иим өрк-бүлмүд дала. Өдгә цагт гермүд хулдлһна халхар тогтсн бәәдлин таалд, хотл балһсна ик зунь эврә гер эс гиж патьр хулдж авч чаджахш. Юнгад гихлә, эднә үн дегд өөдлв. Гермүд унтә, Волгоградт невчк кимд. Иим үн альдас авдгнь медгджәхш.
Хальмгин статистикин заллтин то-дигәр, сүл цагт Элст балһснд гермүдин үн дегд икәр өсжәнә. Тер тоод хуучн патьрмуд икәр үнтәрв. Үлгүрнь, эн жилин негдгч кварталд шин гермүдин үн өрәл процентд өсв, хуучн патьрмуд болхла һурвн шаху процентд икдв.
“Калмыкиястатын” әнгин ахлач Екатерина Литвинован келсәр, давсн жилин дөрвдгч кварталд шин гермүдин үн һурвн шаху процентд өслә, хуучн гермүд тавн һар процентд, давсн жилин чилгчәр болхла иим өслт ирлцнһү дараһар һурвн шаху болн арвн шаху процентд икдв.
Риэлтермудын келсәр, өдгә цагт талдан балһсд одад көдлжәх улс гермүд хулдж авчана. Дәкәд болхла, федеральн данцалһна мөнг авсн әмтн хулдж авх патьрмуд хәәнә. Риэлтерск агентствин директор Баатр Уджаковин темдглсәр, эндр өдрт Элст балһснд нег болн хойр хората хулджах патьрмуд үлдсн уга. Эдниг данцалһна мөнг авсн чернобыльцнр хулдад авчкв. Тегәд чигн үлдсн гермүдин үн өсв. Ода һурвн хората патьрмудыг олн күн хулдж авчахш. Эдниг нурһлж ипотекар хулдж авна эс гиж ик гермүдт дурта улс хулдж авчана.
Баатр Уджаевин келсәр, ода элстихн герән үнтәһәр хулдад, Москва балһснд патьр хулдж авх зурата. Ода Элстин негдгч болн дөрвдгч микрорайодт хуучн гермүдиг әмтн хулдж авхдан дурлхш. Энд нег хората патьр нег сай арслнг күрчәнә. Хотл балһсна дорд үзгин райодт болхла гермүд дегд хуучн биш. Энд патьр хулдж авхин төлә нег сай дөрвн минһн арслнг кергтә. Шин гермүдин нег дөшрвлж метрнь хөрн тавн минһн шаху арслн, хуучн патьрмуд — һучн һурвн минһн арслнг. Риэлтермудын зәнглсәр, зхәрм патьрмудын нег дөрвлж метрнь тәвн минһн арслнг күрчәнә. Тер саамд танһчин тосхлтын министерствин то-дигәр, эн жил һучн долан минһн дөрвлжн метр гер эдлврт орулгдв. Эннь давсн жиллә дүнцүлхлә дөчн процентд баһ болжана. Эннь бас учрта, юнгад гихлә, эн жил олн давхрта нег чигн гер эдлврт орулгдсн уга. Урдк кевәр шин тосхлтын тоод өрәлнь эздүдин гермүд болж һарчана.
Татьяна Дмитриева, Хулхачин Николай
