Хальмгин театрмуд бичкдүдин төлә соньн наад үзүлжәнә
“Театр — бичкдүдт” нертә долан хонгин йовудт уйн наста хәләһәчнр “Сделай свой мир красивым” нертә шин тууль хәләж чадв. Иим соньн наад хәләсндән бичкдүд ик байрта бәәнә. Онц келхд, сүл цагт Элст балһснд театрмуд бичкн көвүд-күүкдин төлә өвәрц наад белдж үзүлжәнә. Тер бийнь шин үүдәвр бичкн хәләһәчнрт тенкән уга гидгәр таасгдв.
Наад хәләхәр ирсн бичкдүд тетарин декорацд болн бичкдүдин шууганд авлгдв. Кииһән авлго эдн хавхнт, матр болн меклә һәәхв. Эврәннь нуурин эргндк ө-шуһу мод харсж авхин төлә эдн кесг боомтг давж һарв. Эднә нур киртә болн му дүрстә бәәдлд хүврж. Театрт ирнс көвүд-күүкд эднлә хамдан зовад, зәрмнь дор ормдан сууж чадлго, хәәкрәд, мал-аһруснд нөкд болхар седв. Илвтә шир тахсн бичкн усна үкр ирхлә, бәәдл икәр сольгдв. Билгтә бичкдүдин драматург Светлана Королеван бичсн пьесар тәвсн Сделай свой мир красивым көгжмин туульд Волгоградск государственн искусствин болн сойлын институт төгсәсн баһчуд нааджана. Драмин болн шог наадна орсин тетарин актрис Ольга Колесникован келсәр, бичкдүд ик оньган өгч наад хәләв. Бичкдүд эк-эцкнрән сонсж, цаһан седклтәһәр бәәхинь зааж өгчәнәвидн. Театрин актер Григорий Прокопенкон келсәр, эн туульд наадсн кемд бийән хәрү бичкн гиж тоолв. Бичкн цагт цуг эргндк сән болж медгднә.
Цаһан седклтә болн өршәнһү бичкн усна үкрин нилчәр, наадна дүрмүд болн уйн наста хәләһәчнр илвтә кевәр му дүрстә нууриг ке-сәәхн бәәрнд хүврүлв. Артистнрин келсәр, иим ик сценд эдн түрүн болж һарчана. Бичкн цагтан хәрү эргж ирснлә мет болв гиж баһ наста актермуд келнә. Эдн наадна өмн үүмәд бәәв, тер бийнь наадн эдн бас икәр таасгдв. Орсин театрин артист Ренат Дентелиновин келсәр, иим бичкн хәләһәчнрт наадна цуг чинринь медлүхин төлә актермуд эврән бичкн улст хүврх зөвтә. Энүг сцен деерәс медүлж үзүлх кергтә.
Театрин артистк Анастасия Качина темдглсәр, энүнә наадсн дүр бичкн усна үкрт дөн болад, нууриг сәәхрүлв. Энүнә һол учр-утхнь — цуг кергиг хамдан ни-негн кех кергтә, нег-негндән иткх зөвтәвидн.
Режиссер Александр Шегловин тоолврар, мана өөр сән болн цаһан седклтә улс дала гиж тууляр дамжулда..ад бичкдүдт медүлжәнәвидн. Удл уга көгжмин наадыг Волгодонск балһснд эдн үзүлх. Театрин режиссер Александр Шегловин келсәр, эн тууль йир ик ухан-сана өгнә, энүнд әәмшгтә дүрмүд уга, цугтан цаһан седклтә болн сән зангта. Бичкдүдт иим тууль йир таасгдна.
Бичкдүдт болн эднә эк-эцкнрт тууль, ке-сәәхн артистнрин хувц-хунр болн баһ наста актермудын билг-эрдм таасгдв. Онц келхд, танһчин шүлгч Лия Шеглован бичсн шүлгүдәр үүдәсн дуд нааднд орв. Көгжм йир таасгдна. Бичкн усна үкр таасгдв, әвр цевр сән зангта. Матр бас өршәнһү седклтә болж һарв.
Туулин дүрмүд дураһад, эднәс үлгүр-үзмж авхан уйн наста хәләһәчнр медүлв.
Ээнән Делгр, Колдан Церн
