Элст балһсна зун хойр өрк-бүл шин бүүрт нүүж орв
Элст балһсна зун хойр өрк-бүл шин жилин байрт сән белг авв. Хуучн нурад унжах гермүдәс әмт нүүж орулһна Федеральн программар һурвн шин герин патьрмудын түлкүр эдн байрин бәәдлд бәрүлж өггдв.
Вера Пикулевин өрк-бүл эврәннь байрарн өөрхн улслаһан хувалцхар седв. байрин бәәдлд гер эдлврт орулсна хөөн, шин патьрт гиичнриг байрин ширә күләжәж. Шин бүүрт орсн улсиг түрүн болж Хальмг танһчин толһач Алексей Орлов йөрәв. Энүнә хөөн эднә элгн-саднь болн хам-хоша бәәх улс ирв. Эцкин келсәр, гер йир сән, дулан, ода мебель тәвх кергтә.
Урднь Пикулевин өрк-бүл Правда нертә уульнцин хуучн нурад унжах герт бәәсмн. Хойр минһн негдгч жилд асхад хур орсна хөөн, эднә гер дөрвн әнгәр шуурв. Тегәд тер цагас гер нурад унх гиһәд әмтн икәр әәдг болв гиж Вера Пикулева келнә. Хойр минһн нәәмдгч жилд шин патьр авх ицл орв. Тер цагт мана танһчд әмтиг хуучн нурад унжах гермүдәс нүүлһх федеральн программ экләд күцәгдв. Вера Пикулеван келсәр, дедг ик байр болв. Нег үлү, шин жилин өмн өргнд эннь йоста чеежин сергмж болв.
Вера Пикулевала хамдан шин бүүрт дәкәд зун хойр өрк-бүл нүүж орв. Эдн цугтан хуучн нурад унжах герт бәәршлсмн. Иим программар Элст балһснд шин гер тосхгдв — Пюрбеевин нертә, һурвдгч болн негдгч микрорайодт иим гермүд дүнгәж ик холас үзгднә. Иим гермүд бәрхин төлә ут-тоодан зун хойр дундур сай арслнг һарв. Шин гермүд өдгә цагин цуг некврлә ирлцжәнә. Шин патьрмудт дула өгдг автономн систем бәәнә, цуг кергтә залһлдан орулгдв, шин терз-үүдн углж тәвгдв. Хальмг танһчин толһач Алексей Орловин келсәр, удл уга дәкәд нег миһн эслтихн иим сән бүүрт нүүж орх. Бүклднь авад келхлә, иим то мана танһчд ик то болжана.
Ут-турштан болхла эн жил зун найн йисн Элстин өрк-бүл шин патьр авцхав. Ут-тоодан энүнә төлә хойр зун сай арслнг олзлгдв, эднәс найн тавн сай арслнг Элст балһсна хазн йилһж өгсмн. Тер саамд Элст балһсна олн давхрта далн зурһан гермүдт бәәх әмтн эврәннь чеерүдән күләжәнә. Эднә гермүд бас хуучн нурад унжах гермүд гиж шиидгдв. Эдниг цугтаһинь хотл балһсна подпрограммд орулад, иргч жилд эн төр цаарандан хаһлгдх зөвтә. Оржах жилд Элст балһснд Ленина нертә болн Клыковин нертә уульнцд бәәх долан герин улс шин зун нәәмн патьрта герт нүүж орх зөвтә.
Татьяна Зубцова, Дукмана Николай
