Элст балһсна ор һанцхн Колонск боодгт сәәнәр амрдг таал уга
Элст балһсна Колонск боодгт бичкдүдлә зерг сокту улс олар ирж амрна. Сүл долан хонгт соктуһар уснд орад өөмжәсн дөрвн күн харсж авгдв. Нег үлү, хотл балһсна ор һанцхн пляжин өөр зунын кафе секгдв. Эн хот-хоолын предприять өрүн күртл көдлнә. Тегәд чигн әрк чаһр ууһад, уснд өөмх улсин то зөвәр өсв.
Хальмг танһчла хам-хоша бәәх региномудын пляжмудт әрк-чаһр хулдгдна. Зуг Элстин Колонск боодгин харсачнрин некврәр, хотл балһсна һардачнр энд әрк-пиив хулдж болшго гиж шиидв. Келхд, харсачнр боодгин өөр өдр-сө уга гилтә көдлнә. Тер бийнь сокту улсин то усна өөр баһржахш. Ода пляжж әрк-чаһ хөрн минһн арлснг ял өгх кергтә. Болв иим чанһ засг баһчудыг зогсажахш. Келхд, Әрәсән закаһар соктуһар уснд өөмхәр орж йовн кү харсачнр зогсах зөв уга. Тегәд эдн иим улсиг зуг хәләж бүрткнә. Харсач Сергей Васильевин келсәр, өдр болһн сокту улс энд дала. Полиц нөкд болх зөвтә. Пляжас сокту улсиг көөх зөв уга. Зуг уснд күнд бәәдлд тусст әмтн нөкд болх даалһвртаһар көдлжәнә.
Өдр болһн Колонск боодгин өөр хойр күн церглжж, диг-дара харжана. Батлж авгдсн зокалар иим улсин то ик болх зөвтә. Эдн нег-негнәсн тәвн метрт зогсж көдлх зөвтә. Зөв йосна органмудын көдлжәх хойр көдләч энд дегд баһ. Нег үлү, асхн-сө баһчуд нааран олар ирәд, соктад ноолдна. Колонск боодгин харслһна станцин ахлач Валерий Егоровин келсәр, нааран нурһлж баһ наст улс ирж, цуглрна. Райодас ирсн әмтн нәәжнрән энд олж авад, асхн-сө амрна. Энд эжго, усн өөрхн, тегәд иим бәәрнд баһчуд дурта.
Давсн сард Колонск боодгт һучн нәәмн наста залу күн әмнәсн хаһцв. Эн күн уснд өөмдг зокал эвдәд, өөсн бәәж. Нег үлү, сокту күн уснд орхла, ик әәмшгтә болна. Иим күн уснд чивәд, эврән уснас һарч чадхш. Вадимын келсәр, әрк энд ууж болшго. Пиив ууж болх. Талын һазрт одад амрхд мөнгн күртжәхш.
Элст балһсна гиичнр пляжд иим бәәдл түрүн болж үзжәнә. Эн күүкд күүнә темдглсәр, түрүн болж хальмгт иржәнә. Пляж таасгдсн уга. Сокту күн олн. Эннь һундлта. Энд амрхд әәмшгтә. Элст балһсн сәәхн. Зуг пляжин бәддл му. Энд-тенд шил, хог-бог дала.
Тегәд иим бәәдл үзхлә, нааран ирәд амрх дурн күрхш. Нег үлү, ода Элст балһснд зуг ор һанцхн усна боодг бәәнә.
Санкун Кермн, Бадмаран Владислав
