Долан наста Максим Сидоров ода күртл олдсн уга

Март сарин 4-д Үстин района Цаһан —Амн селәнд геедрж одсн долан наста Максим Сидоров ода күртл олдсн уга. Хәәврин көдлмшт ут тоодан 200 күн орлцжана. Цуг Үстин района полицин, района болн селәнә муниципальн бүрдәцин көдләчнр, өөрхн элгн саднь геедрж одсн көвүг хәәжәнә.

Эндр өдр хәәврин көдлмш цааранднь давулгджана. Астраханск болн Волгоградск областьтин захд бәәх селәдт поселкст хәәврин көдлмш давулгджана. Хәәврин көдлмшт ут тоодан 200 күн орлцжана. Цуг Үстин района полицин, района болн селәнә муниципальн бүрдәцин көдләчнр, өөрхн элгн саднь геедрж одсн көвүг хәәжәнә. Март сарин 4—с авн эндр өдр күртл геедрж одсн көвүнә тускар зәнг зә уга.

Үстин района полицин көдләчнр сурһульта нохаста малын хош эргәд, цаһан амн меләнә захд бәәх селәд поселкст көвүг хәәжәнә. Эндр өдр әмтиг зөөдг таксистнр, әрк чаһр уужах, дәкәд учетд зогсчах улсла көдлмш кегдв. Мөшклһнә органмуд ода эн көвүнә өрк бүллә көдлжәнә.

Владимир Цедеевин келсәр көвүнә өөрхн элгн саднь полиграф шишлнг оборудованьд сурлһна керг үүлдврт орлцв. Долан наста Максим Сидоровин дөчн наста эк Марина Сидорова сүл жилмүдт эк эцкин зөвән геесн әәмшгтә бәәсмн. Хойр минһн нәәмдгч жиләс авн Марина Сидорова болн энүнә өрк бүлнь социальн учетд зогсчана.

Үстин района бичкдүдин зөв харслһна органмудын ах специалист Арслан Шарлдаевин келсәр хойр минһн арвдгч жилд эн көвүнә экин зөвиг уурулх санан билә. Болв эн кергиг бидн күцәсн угавидн юнгад гихлә эн өрк бүлин тускар дала юм медсн угавидн.

Күвүнь геедж одсн Эк марина сидорован келсәр тер өдр хәәврин көдлмш эврән эклв, түрүн болж хамдан наадсн үүрмүдт, болн хамдан сурһуль сурч йовх көвүд күүкдлә күндв. Ода күртл Марина Сидорова көвүһән олдж авхан итклән геехш.

Эндр өдр би хәәвритн көдлмшт орлцжах цуг улст ханлтан өргжәнәв.Эн көдлмшт мини көвүнә үүрмүд сурһульчнр бас дөнгән күргжәнә — гиж Марина Сидорова нульмсан асхрулж маднд келж өгв.

Өдр ирвәс хәәврин көдлмшт орлцжах әмтнә то икдәд йовна. Эндр өдр эн кергт школын багшнр, бәәрн улс, үүрмүд, сурһульчнр, элгн саднь орлцжана. Долан наста Максим Сидоровин багш Ирина Тамбаеван келсәр школд хамдан сурһуль сурч йовх көвүд күүкд ик гидгәр Максимин тускар зовжана. Эндр өдр класст суудг орм сул, нааран күн суухш, цуг сурһульчнр Эрвәннь үр көвүһән күләжәнә, ик гидгәр санжана. Эн көвүг олж авхнь күн болһна зүркнд иткл бәәнә.

Арвн хонг давб чигн эн өдр хәәврин көдлмш цааранднь давулжана. Цаһан амн селәнә әмтн эн көвүг олж авхднь хәәврин көдлмшән чиләшго. Күн болһн эндр өдр эн көвүд әмтд үзхнь итклән геехш.