Дагестана малчнр нәәмәдлжәсн һазр Лаганск районд өггдв
Кесг жилин туршарт хаһлгдад уга һазрин туск хурц төр ода хаһлгдв. Дагестана малчнрин медлд бәәсн зун йисн минһн гектар һазр Лаганск муниципальн бүрдәцин медлд өггдв. Дәкәд нег тодлад келхлә, азр нәәмәдлһнә болзгнь хойр минһн арвн негдгч жилин сентябрь сард төгсв. Ода Лаганск района һардачнр һазриг эзни кевәр олзлж бюджетд немр ору мөнг орулж авх зөвтә. Эн һазрт бәәрн малчнр хальмг тохма мал өскх саната.
Мана өвкнрин һазриг хәрү авхин тускар ик кезәнәс авн санжалавидн гиж танһчин журналистнрла болсн харһлтын йовудт Лаганск района муниципальн бүрдәцин администрацин толһач Андрей Манджиев келв. Школын багш мет самбрин өөр һазрин зүткәнә туужин тускар цәәлһвр кежәнә. Эн төр тәвгдгч жилсә авн хаһлгдад уга. Дагестана малчнр олзлж йовсн идгиг района картд йилһж үзүлж.
Андрей Манджиевин келсәр, ода эн һазрт Дагестана малчнр бәәх зөв уга. Болв эдн ода күртл көдлжәнә. Мана комиссь одад, тадн зөв угаһар энд бәәнәт гиж келх зөвтә. Энүнә хөөн прокуратурт цаас орулж өгх кергтә. Тегәд зөв-йосна органмуд көдлх.
Лаганск районд һучн һурвн һазрин участк өггджәхин туск документ белн болв. Эн һазриг фермер болһн олзлж чадх, тер мет Дагестана малчнр бас иим зөв авхмн. Зуг үүлджәх заканла ирлцәтәһәр марһанд орлцх цаас белдх кергтә. Өдр ирвәс марһанд орлцх улсин то өсәд йовна. Энүнд орлцхин төлә фермермүд бизнес-зура белдәд, яһж һазриг олзлхин тускар болн ямаран ашт күрхин тускар бичх зөвтә. Фермер Александр Горяев селәнә эдл-ахун халхар кесг жилдән көдлжәнә. Эзни кевәр идг олзлад, мал өсклһнд сән үзмж бәрв. Зуг идг уга болад малын то икдүлж болжахш гиж эн келнә. Фермер Александр Горяевин келсәр, найн гектар һазр баһ болжана. Идг дегд бичкн. Эн жил маднд һазр өгв. Тегәд малын то икдүлх санан бәәнә. Долан зун хө болн тәвн толһа бод мал өскх зура бәәнә.
Андрей Манджиевин тоолврар, һазриг олз-тустаһар олзлхин төлә энүнд эзн кергтә. Сүл жилмүдт олн хөөдәс болн бод малас көлтә идг үрж одв. Иим һазрт малыг зуг үвлин кемд хәрүлж болх. Ода болхла энүнд үвл-зун уга олн мал идшлжәнә. Лайф Андрей Манджиевин келсәр, ода Лаганск района һазрин аһу дегд бичкн. Зуг хойр зун минһн гектар бәәнә. Талдан райодт һазр дала. Тегәд алвна кемжән бас баһ болжана.
Лаганск районд тогтагдсн шишлнг комиссь идгин һазриг олзлх улсиг шүүж авад, энүг эзни кевәр олзлхинь бүрткж хәләхмн. Тиигхлә района экономикин ул батрх, бәәрн бюджетд оржах оруһин мөнгнә кемжән икдхмн.
Ээнән Ольга, Владислав Бадмараев
