Бурхн Багшин Алтн сүмд харһлт болв
“Великий вам поклон, все наши ээжи и аавы”. Иим нерәдлһтә санлын асхн Бурхн Багшин Алтн сүмин библиотект болв. Эн керг-үүлдвр хальмг улсиг цаажла харһулсн далдгч жилин һашута өөнд нерәдгдв. Хөрдгч зун жилмүдт хальмгин гелнгүдин күнд жирһлин хаалһин тускар библиотекин көдләчнр келж өгв. Тууврт бәәсн бийнь күнд-түрү цагт Чееря хурл төгсәсн гелнгүд Бурхн Багшд итклән геелго, шажна зангшал харж хадһлад, олн әмтнд дөн-түшг болсмн.
Намка Кичиков, Зодва Натыров, Санж Уланов, Тугмюд Гавджи, Бадма Гедеев. Эннь цугтан хальмгин гелнгүдин нерд. Эдн шар шажнж цуг арһ чидлән медрлән өгч церглсн деерән, күнд жирһлин хаалһ дааж һарсмн. Хальмгин гелнгүдиг цаажла харһулад, туувр йовулад, түүрмд суулһсмн. Болв эдн Бурхн Багшдан итклән геесн уга, эврәннь келн-улстан дөн күргәд, гемтә улсиг эмнүләд, күнд-түрү цагт нөкд-түшг болж йовсмн.
Номт, бичәч Андрей Бадмаевин келсәр, Сиврт әмд үлдсн болн түүрмд сууһад һарсн гелнгүд хальмгудт ик дөн күргдг билә. Эдн оюни урмд әмтнд өгдг бәәсмн.
Күзүцә зовлнг дааһад һарсн гелнг әмтнд туслжана гисн зәнг агчмин зуур хальмг улс дунд тархагдв. Иим гелнгүд олн улсиг негдүләд, йоста харул-хааһул болж йовсмн. Бичәч Полина Дагинован келсәр, нег гелнг энүг күнд гемәс гетлүлж.
Уульхар седсн цагт инәх кергтә гисн урмд Полина Дагинова жирһлин хаалһдан шүүж авв. Иим нертә дегтр бичсмн. Иим кевәр хол киитн Сиврт арвн һурвн жилдән дааж һарсн зовлнгин тускар эврәннь тодлврмударн ачнр-зеенртәһән хувалцхар шиидв.
Бичәч Полина Дагинован келсәр, көгшн улст тер һашута цагин утскар келж өгх арю уга, баһчудт сонсдг цол уга болна. Тегәд дегтр бичхәр шиидв.
Сталинск цаажас көлтә кесг минһн хальмгуд әмнәсн хаһцв, күнд-түрү бәәдл дааж һарх кергтә болв, хальмг улсин өрк-бүл болһнд ик аюл болв. Ода дорас өсж йовх баһчуд өвкнриннь санлынь әрүнәр хадһлжана.
Зурһадгч тойгта эрдмин лицейин оют Константин Аксеновин келсәр, Сиврт үлдсн элгн-садан тодлад эк-эцкнь зул өргнә, хурлд одад зальврж мөргнә.
Зурһадгч тойгта эрдмин лицейин оют Виктор Дюгидовин келсәр, энүнә ээж-аавнь хальмгуд биш, хасгуд. Тер бийнь эдн хальмг улсин ик зовлнгин тускар меднә. насни туршт хальмг танһчд бәәнә. Эн һазриг дурлж төрскн гиж тоолжана. Бидн бас иим кевәр хальмгудыг болн эн һазриг күндлх зөвтәвидн.
Тууврт бәәсн цагт хальмгин гелнгүд шажна үүлдврән хайлго күцәв, шар шажнд сүзглдг улст дөн күргв, күнд-түрү цагт оюни түшг болж урмд өгчәсмн. Цаһан седклтә, әмтнд нөкд болсн гелнгүдт хальмгуд ик ханлт өргж, эдниг күндлж тевчгдг бәәсмн. Ода Бурхн Багшин Алтн сүмин номин библиотекин көдләчнр эднә тускар материал цуглулжана. Эднә тоолврар, хальмгин шар шажна туужин хадһлж, мана келн-улсин оюни зөөриг иргч үйнрт күргж медүлх кергтә.
Елена Алексенко, Хавтхна Анатолий
