Богд уулд хальмгин паломникүд одад мөргж чадх
Хальмг танһчин болн Астраханск областьд бәәх Богдинско-Баскунчакск заповедникин хоорнд зөвшәлтин бооцан батлж авгдх. Энүнә тускар туризмин төрәр болсн селвлцәнд келгдв. Энүнд танһчин йосна органмудын, ведомствсин элчнр орлцв. Онц келхд, заповедникин аһуд хальмгин буддистнрин әрүн Богд уул бәәнә.
Онц кевәр харжах Астраханск областин йиртмжин аһуд нег жилин эргцд зурһан минһн турист ирж хәләнә. Эднәс Хальмг танһчас жил болһн нег минһн нааран ирнә. Эдн шажна ик чинртә Богдо уулд ирж мөргнә. Туризмин делгрлтин төрәр болсн севлцәнд орлцсн государственн заповедникин директор Станислав Борисовин келсәр, эндр өдрт заповедникд Әрүн уулын домгуд нертә шишлнг экологическ маршрут темдглж авгдв. Ода эн программ күцәлһнә төлә белдврин көдлмш кегджәнә. Энд амрлһна бәәрн, беседкмуд болн буддийск шажна авьясар олн-зүсн сооруженьс тосхгдхмн.
Богдинско-Баскунчакский нертә государственн йиртмжин заповедникин директор Станислав Борисовин келсәр, нааран ирәд, нөкцлтин төрмүд хаһлжанавидн. Хальмг танһчин әмтн болн талдан чигн шажнд шүттг улс заповедникд ирәд, мөргж чадх. Эднд цуг кергтә таал бүрдәх кергтә.
Ик Богд уул мана келн-улсин уул нүүдлин сойлын бумб болжана. Тегәд энүг онц кевәр хәләж харжана. Энд темдглсн туритическ маршрутас хажиж болшго, тер мет энд хог-бог асхж болшго, һал шатаж болшго. Тегәд иргч хамцу нөкцлтин программар заповедникин аһуд хальмгин паломникүд яһж бийән бәрхин туск зокал белдж авх кергтә. Дәкәд болхла заповедникин аһуд экскурсь кех таал болн шажна авьяс күцәхин төлә шишлнг таал бүрдәх төр тәвгджәнә.
Богдинско-Баскунчакский нертә государственн йиртмжин заповедникин директор Станислав Борисовин келсәр, эн туст хальмгин правительст бас орлцх зөвтә. Мөнгнә халхар маднд нөкд болхла сән болх. Эс гиж арһлачнр нөкд болж чадх. Эдн беседк болн талдан чигн бичкн тосхлт кеж чаджана. Хальмгин ишкә гер тәвж болх, эн төрәр хамцу үүлдвр кех санан бәәнә.
Иргчдән заповедникд дәкәд нег маршрут — этнографическ маршрут бүрдәх зура бәәнә. Энүнд шажнд шүттг паломникүд болн Хальмгин арһлачнр ик нөкд болж чадх. Танһчин эрдм-сурһулин, сойлын болн номин министр Лариса Васильеван келсәр, иим нөкцлт кехин төлә боомтг уга. Талдан обьектмудын тускар болхла туроператормудла болн арһлачнрла күүндәд, эн төриг халһх зура бәәнә. Эн туст нөкд болх улс олдх зөвтә.
Хальмг танһчин болн Богдинско-Баскунчакский государственн заповедникин хоорнд күцәгдх нөкцлт шажна туризмин делгрлтин һол зөрүлт болх зөвтә. Ода Астраханск областьд Ик Богд уулд хамгин олн паломникүд ирж мөргжәнә. Энүнә ора деерәс давста Баскунчак нуур ил үзгднә, у-өргн тег альхн деер бәәсн болж медгднә.
Бевина Мергн, Ирчин Алексей
