Астраханск наадһасин театр Элстд ирв

Элст балһснд Астраханск наадһасин театрт гастрольд ирв. Хальмгин хамгин бичкн хәләһәчнрин төлә гиичнр Михаил Сукпонина бичсн “Соседушка Лисичка или как Лиса Медведя обманывала” нертә наад үзүлв.

Элст балһснд Астраханск государственн наадһасин театр гастрольд түрүн болж иржәнә. Театрин художествен һардач, Әрәсән сойлын ачта үүлдәч Владимир Долгополовин һардврта артистнр Соседушка лисичка нертә наад үзүлжәнә. Эн шог наадыг йирн доладгч жилд түрүн болж үзүлсмн. Тер цагас авн энүг Казахстана, Сербин, Балгарин, Әрәсән болн талдан чигн орн-нутгудын әмтн хәләж чадв.

Астраханск государственн наадһасин театрин художествен һардач Владимир Долгополовин келсәр, наад хәләсн бикдүд медрл шингәж авх зөвтә. Наадар дамжулад бичкн хәләһәчнр сурһмж авна. Иим наад хәләһәд бичкдүд эврән сән сурһмж авч чаджана. Наадн шогта инәдтә. Хальмгин бичкдүдиг инәлһәд, чеежин сергмж өгх саната.

Гиичнр үзүлжәх туульд мектә болн хулхач аратын тускар келгджәнә. Арат хам-хоша бәәх цаһан седклтә болн ахуч аюд оньдин боомтг учраж зована. Мек-тах кеж даасн арат хам-хоша бәәх аюг оньдин меклхәр седнә. Һол дүрмүдиг артистнр Юрий Дубоносов болн Ольга Шуменко үзүлжәнә.

Артист Юрий Дубоносовин келсәр, наадыг көвүд-күүкд сәәнәр тосв. Артистнр болн бичкн хәләһәчнр дунд залһлдан кегдв гиж келж болх. Артистк Ольга Шуменко келсәр, иим дүр наадхд соньн болна. Бичкдүд иим тууль дурлж хәләнә.

Михаил Супонина бичсн “Соседушка Лисичка” наадна эцүст мектә арат му үүл күцәсн төләд засгла харһна. Мектә аратыг засглхд наад хәләсн бичкдүд бас дөн болна. Арат таасгдв. Улан хувц өмссн аратын дүр соньн болв. Чанһ некрвтә дүр таасгдна. Эврән иим зангта болжана. Сәәнәр инәж авлавидн, йир шогта наад бәәж.

Хальмгин болн Астраханск театрмуд хоорндан бат залһлда бәрж үүлджәнә. Эннь нег-негнәннь үүдәлтиг сәәнәр медхд туслна, үүдәчг залһлда батрулна. Иим хамцу нөкцлт специалистнрт туста болсн деерән, бичкн хәләһәчнриг икәр байрлулна. Талдан һазрт һарч йовлго гертә иим өвәрц наадһасин театр зүж болжана.

Ээнән Делгр, Очра Сергей