Бильярдин соньн марһан Элстд болв
Элст балһснд “Комбинированная пирамида” нертә бильярдин нарта-делкән рождественск марһан болв. Энүнд Волгорадск, Мурманск областьмудын, Ставрпольск, Краснодарск краймудын, Хальмг танһчин, Мари-Элын болн Украина спортсменмүд орлцв. Марһана сангин мөрә хойр минһн арслнг шүүж авхин төлә бильярдин спортын нарта-делкән чемпионмуд Борис Григорьев, Размик Варданян дөрлдв. Марһаг байрин бәәдлд секлһнд Элст балһсна мэр Артур Дорджиев болн танһчин правительствин ахлач Игорь Зотов орлцад, спортсменмүдиг йөрәв. Тер мет марһанд мана танһчин школын элчнр бас орлцв. Зүткәтә марһана ашт нарта-делкән чемпион Размик Варданян түрүн орм эзлв. Хойрдгч ормд Ставропольск крайин элч Вагэ Григорян һарв. Һурвдгч орм Волгоградск областин спортсмен Вячеслав Смольников болн Украина элч Иван Павенко эзлв. Тер мет тавдчг — нәәмдгч орм эзлсн спортсменмүд бас мөнгнә мөрәһәр ачлгдв. Дөрлдәнд хамгин ах наста далн зурһата болн хамгин баһ наста спортсменмүд мөрәлгдв. Хамгин сәәхн наад үзүлсн Хальмг танһчин элч Михаил Дельдинов бас мөрәһәр ачлгдв.
