Бичкн магазидт пиив хулдшго закан яһж күцәгджәнә
Январин нег шинәс авн бичкн магазин-ларекмудт пиив хулдшго закан һарв. Шин закан яһж күцәгджәхинь бүрткхин төлә мана үүдәгч баг полицин көдлчнрлә болн Элстин администрацин специалистнрла хамдан рейд кев. Пиив хулдшго закаг арһлачнрин ик зунь күцәжәхнь медгдв. Болв зәрм хулдачнр урдк кевәр пиив ил хулджаснь үзгдв.
Нег часин эргцд кесн рейдын йовудт пиив хулдлһна закан эвдсн йовдлмуд илткгдсн уга. Зуг Элстин автовокзалын аһуд бәәх хулд-гүүлгәнә палаткмудт иим зокал эвдгджәнә. Мана үүдәгч баг ирхин өмн палаткмудт хулдж кежәх әмтн бултад йовж одсн бәәж. Эднә ормд зуг нег мис эргндк аһу харжана. Хамгин шулун-шудрмг хулдачнр хот-хоалан ширәд тәвж. Пиивиг болхла киитрүлд бүркәд бултулв. Болв мана оператор энүг цокж авч чадв. Энүнә өмн хулдачнр пиив хулджасн бәәж. Полицин көдләчнр болхла энд сө өдр уга йовна. Рейдын йовудт бүрткж хәләсн талдан киоскмудт болхла пиив хулджахш. Хойр долан хонг хоооран киитрүлд пиив дала бәәсмн. Ода болхла энүнә ормд усн болг зер-земш хадһлгджана. Болв эн төрәр хулдачнр цәәлһвр өгхдән дурлжахш. Хулдачин келсәр, шин жилин байрт пиив хулдхар авч. Январин нег шин күртл хулдад чиләв.
Ода Элтсин цутхлнгд пиив хулдж авч болшго. Иим унд хулджах бичкн магази олж авч болшго. Тер бийнь Элстин администрацин специалистнр һурвн хонгин эргцд пиив хулджасн арвн һурвн бичкн магази илткв. Ут-тоодан ода Элст балһснд иим һурвн зун магазин бәәнә. Элст балһсна мэрийн әнгин ах специалист Вячеслав Баглиевин келсәр, хотл балһснд бәәх зун бичкн магазинас арвн һурвнднь пиив хулдгджасн илткгдв. Эднә тускар Элстин администрацд цаасн орулж өггдх. Иим рейдмудыг асхн арвн часин хөөн кех зура бәәнә.
Пиив хулдшго закаг әмтнә ик зунь дөннжәнә. Хотл балһсна медәтнрин келсәр, пиив эдн уужахш. Эднә келсәр, зунын халун өдрмүдт пиив нурһлж баһчуд ууна. Тер тоод күүкд бас пиив уужахнь үзгднә. Күүкд күүнә келсәр, көвүнь арвдгч класст сурчана. Иим закан һарсиг дөннжәнә. Ода Әрәсәд әрк-чаһ уудг баһчудын то өсәд йовна. Энүнә келсәр, ода эк-эцкнр көдлмтән бәәһәд, үрдүдән бүрткж чаджахш. Спорта эс соньмсжах көвүд-күүкд бүкл өдртән хәләвр уга бәәнә.
Шин закаһар асхн арвн часас авн өрүн нәәмн час күртл ик магазидт чигн әрк-чаһр хулдгдшго. Тегәд энүг әртәснь хулдж авх кергтә. Статисткин то-дигәр, арһлачнрин оруһас дөчн процентнь пиив хулдснас хоршагдна. Тегәд чигн ода бичкн магазид болн ларекмуд хаагджана.
Ээнән Ольга, Очра Сергей
