Бичкн артистнр фестивальд сән үзмж бәрв

“Ик балһсна герл”. Иим нерәдлһтә цугәрәсән искусствин фестиваль Ставрополь балһснд болв. Энүнд Украина, Белоруссин, Казахстана, Әрәсән коллективмуд орлцв. Мана танһчин нер Доржина нертә бичкдүдин көгжмин школын сурһульчнр харсв.

Вн зургт Алина Мантеева билг-эрдмән үзүлжәнә. Жюрин оньгт билгтә күүкн “Ноһан Дәрк Бурхна” би тусхав. "Соло" нертә номинацд Алина хойрдгч девснгин лауреатын нер зүүв. Күүкнә келсәр, энүнә үзүлсн бииһәр дамжулад хальмг улсин сойл болн зангшал медүлв. Әрәсән искусствин ачта үүлдәч, Өөрднр бииһин государственн тетарин художествен һардач петр Надбитовин үүдәсн “Тавн хурһн би” бичдүдин ансамбль бииләд, һурвдгч орм эзлв.

Эн күүкнә келсәр, фестиваль таасгдв, хальмгин бичкн артистнр сәәнәр тосв. Талдан коллективмудын билг-эрдм таасгдв гиж эн күүкн келнә. Эн бичкн артисткин келсәр, иим фестивальмудт бичкдүдт дамшлт хоршасн деерән, талдан артистнрла таньлдна, шин нәәж олж авна.

Цугәрәсән марһанд уйн наста артистнр зу һар би үзүлв. Ансамблин художественн һардач Ксения Шалхакован келсәр, иим олн коллектив дунд Доржина нертә бичкддүин көгжмин школын сурһульчнр призермудын тоод орад, иим сән үзмж бәрснь бас ончта йовдл болв. Эннь дәкәд нег диилвр болж һарв. Келхд, урднь эдн цугәрәсән болн нарта-делкән марһасин призермудын тоод орсмн. Ксения Шалхакован келсәр, бичкдүд өдр болһн гилтә чидлән нөөлго дасхл кенә. Тегәд чигн энүнә ашнь сән болв.

Бичкдүдин ансамблин художествен һардач Ксения Шалхакован келсәр, иим сән үзмж бичкдүд бәрснд икәр байрлжана. Сән белдвр кеж. Зуг цаг бачм болад бәәв. Тер бийнь күүкд сәәнәр белдв. Ода талдан марһанд белдх кергтә.

Эндр өдрәс авн бичкн биичнр дарани марһанд белдврән эклв. Эдн иргч жилд талдан регионд одад, билг-эрдмән үзүлх.

Ээнән Делгр, Котиан Валерий