Бичкдүдин художественн коллективмудын марһан Элст балһснд болв
«Ицл бәәнә». Эврә дурар үүлдг бичкдүдин художественн коллективмудын иим нертә марһан Элст балһснд болв. Концерт жил болһн бүрдәгдж давулгдна. Эн жил эүнүд долан зун бичкдүд орлцв. Көвүд-күүкд онц кевәр билг-эрдмән үзүлв, коллективарн чигн дуулад-бииләд олн улсиг байрлулцхав.
Марһан йир бүрдәмжтәһәр давулгдв. Бичкдүд иим ик чинртә фествиальд ке-сәәхн хувц белдж, олн-зүсн би үзүлв, енгсг ду дуулв. Насарн ирлцүлж программ бийдән шүүж авцхаж. Дашлтта багшнр бас сән белдвр кеһәд, фестиваль хәләсн улст болн жюрид таасгдх программ кех селвг өгсн бәәж. Хөрдгч тойгта бичкдүдин садын көгжмин һардач Ольга Бананован келсәр, давсн жилд эн ду дуулхар шүүж авч. Болв тиигхд көвүд-күүкд дегд бичкн бәәсмн. Ду шүүж авлһн бас ик чинр зүүжәнә гиж эн келнә.
Келхд, Элстин хөрдгч тойгта бичкдүдин садын көгжмин һардач ду шүүж авхларн эндүрсн уга. Тегәд чигн вокальн багд энүнә бичкдүд түрүн орм эзлв. Эн номинацд талдан көвүд-күүкд бас сән билгән үзүлв. Үлгүрнь, йисдгч тойгта бичкдүдин садын коллектив “Рождественская” нертә ду белдж. Энүг эдн өөрджәх католическ байрт нерәдж.
Бичкн көвүд-күүкдт эднә художественн һардачнр нөкд болсн болхла, ах багин бичкдүд болхла эврән үзүлх программан шүүж авч. Милана Карпован келсәр, олн-зүсн ду меднә. Эн дун седкл авлм дун болжана. Тегәд энүг шүүж авлав гиж Милана келнә.
Аштнь Милана Карпова сольн номинацин марһанд түрүн орм эзлв. Фестивалин күндтә гиичнр болн жюрин гешүд дииләчнрт болн призермудт күндлһнә һашгуд болн үнтә белгүд байрин бәәдлд бәрүлж өгв. Иим концерт хоосн марһан биш. Иим соньн дөрлдән бичкдүдт чик сурһмж өглһнд болн билгинь делгрүлһнд сән нилчән күргжәнә гиж багшнр тоолжана. Иим керг-үүлдвр билгтә көвүд-күүкдиг йилһж авлһнд туслна. Элстин болн Хальмгин епархийн епископ Зиновий келсәр, иим марһан сойлын зөөр сергәж босхжана. Бичкдүдин билгинь делгрүлж, олн улст чеежин сергмж өгнә.
Фестивалин һардачнрин болн бүрдәһәчнрин келсәр, энүнд орлцсн бичкдүдин ик зунь школан төгсәчкәд, үүдәгч үүлдврән хайшго. Эднәс сән эрдмтә артистнр чигн һарад бәәх. Тегәд марһана “Ицл бәәнә” гисн нерн энүнд ил герч болжана.
Азыда Надежда, Колдан Церн
