Баһ Чонс селәнд бичкдүдин садмудт чеерүд уга кегдв
Баһ Чонс селәнд Целинн районд хамгин түрүнд бичкдүдин садмудт чеерүд уга кегдв. Дошколдьн учрежденьд капитальн ясвр кесн хөөн көвүд-күүкдт ик кезәнәс авн күләжәсн орм өггдх. Селәнә улсин, тер тоод бичкдүдин байр хувалцхар нааран танһчин толһач Алексей Орлов ирв. Энүнә тускар мана зәнгч Ээнэн Ольга келжәнә.
Бичкдүдин садт капитальн ясврин көдлмш күсдундур сарин эргцд күәцгдв. Жирн йисдгч жилд бәсрн гер иим кеәвр ясрх гиж селәнә улс санжасн уга. Хуучн модн терзин ормд шин пластикин терз углж тәвгдв. Садын герт у-сарул хорас кегдв. Энд көвүд-күүкдт цуг таал бүрдәгдв. Тосхлтын көдлмшин төлә района бюджетас хойр сай арслнг йилһж өггдв. Тер мет ясвр темдглсн болзгт төгсәхд спонсормудын бас дөн күргв.
Очн нертә бичкдүдин садын һардач Галина Боляеван келсәр, эн жилин июлин нег шинж капитальн ясвр эклсн билә. Августын арвн тавнд көдлмш төгсв. Энүнә өмн иим ясвр кегдәд уга билә. Герин иора шинрүлв, терз үүд сольв.
Хамгин икәр олн үртә экнр байрлжана. Тер тоод Айса Кикеева. Бичкдүдин сад байрин бәәдлд секлһнә байрт сентябрин нег шин эн дошкольн учрежденьд орх отхн күүкән дахулж ирв. Ода бичкн Альма шин коллективд ижлджәнә.
Айса Кикееван келсәр, ик кезәнәс авн күләжәсн ясвр садт кегдв. Энүг кесгтән күләж. Ода күүкн дошкольн учрежденьд орх, тиигхлә көдлмшт һарх арһ учрх.
Селәнә дошкольн учрежедньд дөчн көвүн-күүкн орж чадх. деернь арвн немр орм секх зура бәәнә. Тиигхлә эн селәнд бичкдүдин садт чеерүд уга кегдх. Бичкдүдин сурһулин программар төрскн кел дасхлһнд онц оньг тусхагджана. Бичкдүдин сад байрин бәәдлд секлһнә байрт бичкн көвүд-күүкд хальмг келәр келәд, цуглрсн улсиг байрлулв. Танһчин толһач Алексей Орлов учрежденьд ноутбук белглв. лайф дети поют лайф Танһчин толһач Алексей Орловин келсәр, кесг жил болад бичкдүдин садт капитальн ясвр кех арһ учрв. Эндр шинрүлгдсн дошкольн учреждень эврәннь үүдән секәд бичкдүдиг тосж авчана. Бичкдүдин төлә энд цуг таал бүрдәгдв. Иим көдлмш бидн кеж чадвидн, нег үлү иим бичкн селәнд ясвр кеснь бас ончта керг болв.
Целинн район адалн тавн жилин өөнин программар болсн селәнә байрт Алексей Орлов эн эдл-аху босхж авсн улст ик ханлтан өргв. Эднд региона һардач күч-көлснә ветерана иткүлин цаас бәрүлж өгв. Иим ветеранмудт өгдг дөнцл мөнгнә кемжән иргчдән өсх гиж Орлов иткүлв.
Роспотребнадзорин региональн заллтин зәнглсәр, зунын амрлһна кемд бичкдүдин лагерьмудт хальдврта гемәр көвүд-күүкд гемтсн уга, шалзас зуулһсн уга, зеткртә йовдлмуд учрсн уга. Эннь сән аш болв. Роспотребнадзорин заллтин көдләчнр зунын кемд зун тәвн бүртклһ кесмн. Иим бүртклһнә ашт дуту-дундс чиклснә хөөн бичкдүдин амрлһна лагерьмудт зеткртә йовдл учрсн уга. Специалистнрин келсәр, көвүд-күүкд лагерьмудт сергмжтәһәр амрв, цогц-махмудан батрулв.
Хальмгин МЧС-ин зәнглсәр, августын хөрн негнәс авн хөрн һурвн күртл Көтчнрә, Яшкульск, Хар Һазра, Городовиковск болн Ик-Буурла райодт халун болад, түүмр шатх әәмшг бәәнә. Энүнәс көлтә бачм чинртә бәәдл тогтх, түүмрәс көлтә муниципальн чинрәс өөдән биш зеткртә йовдлмуд учрх әәмшг бәәнә.
