Баһчуд рок-фестивальд белдвр кежәнә
Элст балһснд дарани рок-фестиваль болх. Энүнд дурна, бәәдл-жирһлин болн әмтиг үүмүлжәх төрмүдин тускар эврәннь дуунд дуулжах көгжмчнр нег сценд цуглрх. Ода баһчуд дуулх үүдәврмүдән шүүж авчана, сценическ хувц-хунр белджәнә.
“Я уйду за тобой” нертә дун “Факультет” багин хамгин дурта дун. Энүг һурвн жил хооран үүдәж. Энүнә зокьялчнь — рок-коллективин дууч Александр Матвеев. Энүнә келсәр, көгжм оньдин соньмсулдг билә. “Прощальное письмо” нертә композициг арвн негдгч класст сурчаһад бичсн бәәж. Энүнд билгтә көвүн эврәннь тускар келж өгәд, тер цагт ямаран ухан-серл энүг авлжасн тускар медүлв. “Факультет” багин дууч Александр Матвеевин келсәр, хамгин түрүнд дуд экләд бичсн кемд энүг хойр халхар үүдәв. Нурһлж лирическ чинртә, дурна туск дуд бичдг болв. Мана бәәдл-жирһлд бидн эврән эзн болх зөвтәидн. Тер мет багин программд шогта дуд орв. Энүнд улсин дуту-дундсин тускар келгджәнә.
Коллектив зурһан жил хооран бүрдәгдв. Иргч фестивальд көвүд билг-эрдмән үзүлсн деерән, белдсн үүдәврмүдән олн улсин оньгт тусхаж чаджана. Тер мет талдан региона көгжмчнрлә харһад күүндх саам учрхмн. Коллективин хань кесг дәкж сольгдв. Зуг репертуарнь тер кевәрн үлдв. Деед сурһульд сурчасн кемд Виктор Тарасов эврәннь рок-баг тогтах саната бәәж. Зөрсн күцлдән күрв.
Ода олн әмтнә зүрк авлхин төлә ик көдлмш кех кергтә, шин үүдәврмүд үүдәх зура бәәнә. “Факультет” багин бас-гитарист Виктор Тарасовин келсәр, рок көгжмин айлһнь таасгдв. Иим дуудыг шүлгүд гүн ухан-учрта. Түрүн авгтан металиик көгжмиг кассетд сонсдг бәәж. Энүнә хөөн “Нирвана” багин үүдәлт таасгдв, Виктор Цойин дуд дурлж сонсдг болв. “Факультет” багин гитарист Нарн Кугультиновин келсәр, хоорндан көгжмин утскар зүткнә. Күн болһн эврә хәләцтә, зуг цугтан рок көгжмд дурта.
Баһ наста көжмчнр “Погаснет свет”, “Гладкая игла”, “Потерянный в прошлом” нертә дуд үүдәсмн. Эдн цугтан көгжмд йир дурта улс. Рок көгжмин нертә дуучнрас болн коллективмудас эдг үлгүр авад, уралан девшхд олз-туста болв. “Факультет” багин көгжмч Чингис Бадендаевин келсәр, “Выстрелы” нертә дун икәр таасгдна. Энүг бичсн цагт ухалжасн сананла ирлцсн бәәж.
Рок көгжм эн көвүдт үлмә уга бәәлһнә темдгин көгжм болжана, энүнд ухалжасн санаһан ил кевәр медүлж болжана. Удл уга рок багин үүдәлтд дурта әмтн таасгдсн үүдәврмүдән сонсж чадх.
Ээнән Делгр, Настан Сергей
