Әрәсән мини-футбольн марһанд Хальмг Танһчас “Динамо” команд орлцх

Зөв йос органмудын көдләчнрин дунд цуг Әрәсән мини-футболын марһанд Хальмг Танһчас “Динамо” команд орлцх. Ашлгч марһан давсн амрллһна өдрмүдт “Уралан” стадионд давв.

Эврәннь командан Әәдрхн областяс ирсн баһчуд күчтә кевәр дөөнв. Эдн эврәннь командын тускар зург зурад, дүүдвран чигн хәәкрв. Әәдрхнә зөв йосна органа көдләчнр прокуратурин командын кесг гол орулв. Талдан стадионд мини футбольн марһан прокуратурин болн следствен комитетин көдләчнрин хоорнд давв. Әәдрхн областин көдләчнр хойр дәк Самохина кубокин турнирт орлцчана. Давсн жилд эдн Хальмг Танчд давулгдсн мини футбольн марһан ик гидгәр таасгдв. Эн жилин турнириг эдн тенкән уга күләв.

Әәдрхн областин прокурор Олег Дупакин келсәр эн жилмүдин эргцд бидн үүрмүд болувидн. Жил болһн хальмгуд мадниг күчтә кәвәр тосна. Мадн бас эдниг сән кевәр тоснавидн.

Прокуратурин кубокт нерәдсн турнир һурв дәкч давулгдна. Хальмг Танһчин прокурор Сергей Табельский келсәр Тиим турнирмуд олн зүсн халхасн дөнгән күргнә. Көдләчнр футбол наадсн деерән үүрлдәд зовлнгшта цагт нег негндән дөн күргж чадна. Эн турнирт залу улсан дөннхәр эднә авальмуднь, бичкн көвүд күүкднь ирсн билә. Эднд йоста байр болв.

Ашлад келхлә турнир эклснәс авн әәдрхн областин команд нүүрт һарсн билә. Болв хөөн эдн дөрвдгч ормд һарв. Түрүн орм судебн департаментин көдләчнр авб.

“Уралан” стадионын өөр бәәсн стадионд өмн үзгин федеральн округин команд дунд марһан болв. Энүнд Сарпуль, Әәдрхн, Аһш, Краснодар, Нальчик болн Элст балһсмудас ирсн команд орлцв. Финальн дөрлдәнд Элст балһсна команд диилвр бәрв.

Игорь Гальченко келсәр давсн жилд динамо командыг Краснодар балһсна командн диилв, эн жилд болхла саән белдв кеһәд диилв бәрләвидн.

Эн жилин сентябрь сарла ман хальмгин динамо команд цуг әрәсән мини-футбольн марһанд орлцх.

Дмитрин Татьяна, Очра Сергей