Әәдрхнд хальмгин улсин туск һәәхүл көдлжәнә
Хальмг улсин нүүдлин бәәц. Иим нерәдлһтә Элст балһсна һәәхүл Әәдрхн балһсна Кремльд секгдв. Эн экспозиц Астраханск музей-заповедникин болн Пальмовин нертә келн-улсинм узейин хамцу программар бүрдәж давулгджана.
Алдр теегин нүүдлин сойл авьяс. Ик кезәнк, өвәрц зангшал. Бәәдл-жирһлин күнд таалд ирлцсн хальмг улсин авг-бәрц болжана. Хальмгин ишкә гер хәләхлә, эннь ил герч болжана. Арвн зурһадгч зун жиләс авн нүүдлин бәәдл-жирһлин авьяс хадһлсн болжана. Әәдрхн балһсна музейин герлд ишкә гер өвәрц болж үзгднә. Энүнд һәәхүл хәләсн күн болһн оньган тусхана. Иим ик гериг нег чигон хадас олзлго тосхдг билә. Тер бийнь музейин көдләчнр ишкә гериг һурвн часин эргцд цуглулж чадв. Иим герин улд эвкәстә эрс, түшг болн утан һардг монцхр ора бәәнә.
Астраханск кремль нертә нертә туужин архитектурн комплексин әнгин ахлач Николай Бесчастновин келсәр, хальмг улсин ишкә гер орчлнгин кев-кец гож этнографмуд тоолжана. Түшг болгч бахн деер бәәх герин монцхр ора эннь тенгр гиж тоолгдна. Энүнә тускар олн-зүсн ухан-тоолвр бәәнә.
Николай Бесчастнов һәхүл хәләхәр ирсн улст хамльгин сойлын тускар тодрхаһар келж өгнә. Энүнә тоолврар, ишкә герин дотрк цугнь эврә чинр зүүжәнә. Герин цутхлнг хамгин күндтә ормиг гиичд өгдг бәәж. Иим герт эрк биш шажна предметмүд болн мөргүлин дамр бәәх зөвтә. Нүүдлин кеәвр бәәдг хальмгуд дала хувц-хунр белдж авдго билә, олн-зүсн предметмүд хадһлдго бәәсмн. Болв эврәннь герән болн хувц-хунран кеерүлдг билә. Нүүдлин келн-улс эврәннь ишкә герән болн хувц-хунран иим ке-сәәхнәр кеерүлж йовсинь һәәхүл хәләсн улс темдглнә. Энүнә тускар хуучн зургуд болн хальмгин келн-улсин хувц ил герч болжана.
Һәәхүл хәләсн күүкд күн Людмила Пронякина келсәр, энүг урн һарин эрдм икәр соньмсулжана. Зег хатмхр болн алтн утцар хатмхр кедг эрдм йир өвәрц. Һәәхүл йир икәр таасгдв.
Астраханс к облатсин улс дару-дарунь хальмг улсин кезәнк авьяс сойлла өөрхн таньлдх арһ учрна. Хальмг улсин нүүдлин бәәц нертә һәәхүл хойрдгч экспозиц болв. Урднь Элст балһснас өдгәц агин эрдм гидг нертә һәәхүл Әәдрхнд көдлсн билә.
Астраханск кремль нертә нертә туужин архитектурн комплексин әнгин ахлач Николай Бесчастновин келсәр, астраханск музей-заповедник болн хальмг танһчин келн-улсин музей хоорнд өөрхн залһлдан тогтв. Февраль сард һәәхүл секгдсн билә. Ода энүг Әәдрхн балһсна олн улс болн гиичнр икәр соньмсж хәләжәнә. Талдан келн-улс яһж бәәсн тускар медхд соньн болна.
Эврәннь халхасн астраханцнр Хальмг танһчд дәрин туск туужин һәәхүл йовулв. Энүнд орс улсин хуучн бе-селм, цергә хувц-хунр бәәнә. Ода Астраханск кремльд Хальмг танһчд үзүлх экспонатмуд дала.
