Өнчн бичкдүдиг өрк-бүлмүдт авсн эк-эцкнрт мөнгн өггдх
Өнчн бичкдүдиг өрк-бүлдән авсн эк-эцкнрт сар болһн хөрн минһн арслнг өггдх, инвалид бичкдүдиг авсн улс һучн минһн арслнг авхмн. Иим эк-эцкнриг дөннлһнә туск региональн закана төсв ода Хальмг танһчин олн-әмтнә хуралын хәләврт орулж өггдв. Давсн жилд найн көвүн-күүкн өрк-бүлмүдт авгдв.
Эрендженовихна өрк-бүл Аршан поселкд түрүн болж бичкдүдин герәс күүк гертән авсмн. Тиигхд Маша күүкн зуг дөрвн наста билә. Эн гер энүнд ода төрскн гер болв. Ода эдн цугтан ни-негн өрк-бүл болж бәәнә. Онц келхд, Маша күүкн эврәннь хөвән йилһж авсмн. Румия Ивановна бичкдүдин герт ирәд, бичкдүдиг шинжлж хәләв. Маша күүкн түрүн болж эн күүкд күн тал өөрдәд, мама гиж дуудв. Иим кевәр күүкн энүг күндлснд Румиян зүркнь хәәлв. Румия Эрендженован келсәр, эн күүкн түрүн авгтан дун уга, йоста бичкн богшурһа мет билә. Кесг цагтан өрк-бүлд ижлдв. Ода эмәхш, юмнас әәдгән уурв.
Румия Эрендженован келсәр, зуг өрк-бүлд көвүд-күүкд цуг кергтә килмж авч чаджана. Иим килмж бичкдүдин герт авч болшго. Өрк-бүлд иим көвүд-күүкд цуг кергтә таал бүрдәхд амр биш. Эдн өрк-бүлин йоста гешүд гиж бийән тоолх зөвтә. Ода Маша күүкн экдән цуг халхар дөн күргнә. Гертән ода эвврән цуг көдлмш кеж, герән ахулад авчкна. Ааһ-сав, пол эврән уһаж чадна. Иргчдән ямаран эрдмтә болхан оданас авн зуралад авчкв. Энүнә тоолврар, повар күн хамгин әмтәхн шимтә хот-хол кеж чадна. Маша күүкн келсәр, экм хот-хол кесн цагт нөкд болна. Тәрә темс керчәд, салат кенә. Үлгүрнь, шин жилин байрт эктәһән оливье салат кенә.
Маша күүкн ода дала үг келхш. Болв маднла харһад күүндсн цагт, өрк-бүлдән һарсн өдр яһж темдглдгин тускар келж өгв. школд ямаран предмет таасдгин тускар бас хувалцв. Пластилинас гер болн кү кехдән дурта гиж күүкн келнә. Иим көдлмшт келһнд күүкн дала цаг тусхана. Иим кегдлмүд кеднь бас учрта. Специалистнрин келсәр, күүкн иим кевәр эврәннь герән тосхж, энүнд бәәх өөрхн улсан үзүлжәх темдгл болжана. Ода хальмг танһчд найн көвүн-күүкн государственн учрежденьст бәәнә. Иим бичкдүдиг көвүшлж авсн эк-эцкнр региональн һардачнр мөнг өгх зурата. Энүнә туск закан уд луга олн-әмтнә хуралын депутатнрин хәләврт орулж өггдхмн.
Хальмгин олн-әмтнә хуралын ахлач Анатолий Козачкон келсәр, өнчн бичкдүдиг өрк-бүлд авсн эк-эцкнрт сар болһн мөнгн өггдх. Эдн сар болһн хөрн минһн арслнг авх. Инвалид бичкдүдиг авсн улст иим мөнгнә кемжән ик. Энүнә тускар ик чинртх социальн закан батлж авгдх. Бичкдүдин герт бәәх ончн көвүд-күүкдиг өрк-бүлмүдт авхд иим закан сән нилчән күргх.
Тер саамд танһчин эрдм-сурһулин министерств хаалһин карт белдв. Энүнд өнчн бичкдүдиг өрк-бүлмүдт оурлж авлһна төлә күцәгдх керг-үүлдврмүдин зура темдглж авгдв. Тер мет энүнд жирлһин күнд бәәдлд туссн өрк-бүлмүдт болн баһ наста өрк-бүлмүдт дөн күрглһнә зура бәәнә, өрк-бүлдән бичкдүдиг авх эк-эцкнрин төлә сурһуль бүрдәлһнә төрмүд орв. Эк-эцкнин хәләвр уга бәәх көвүд-күүкд эврәннь эк-эцкән күләһәд, энүг эрк биш өрк-бүлд авх гиж нәәлжәнә.
Ээнән Ольга, Котина Валерий
