Әрәсән ачта артист Владимир Воронцовин концерт Элстд давв

Дурна туск дун нарта орчлңг деер тер тоод мана хальмг таңһчд чигн дала. Таңһчин хотл Элст балһсна туск дун болхла хатяр харһна гиж келх кергтә. Мана хотл Элст балһсн-архитектормудт, зурачнрт, журналистнрт болн көгжмчнрт йоста олз гиж таңһчин гиичнр болн туристнр тоолжана. Әрәсән ачта артист Владимир Воронцов мана сувсн болсн балһснд нерәдсн дууһан олна оньгт тусхав.

Эн поэтическ үүдәвр мини уханд генткн орв гиж Владимир Воронцов келнә. Түрүн болж хотл Элст балһснд ирсн цагтан цутхлнгар йовж йовад холас соньн көгжм сонсв. Тер йовдл ду үүдәх тоолвр өгв-гиж көгжмч ухан-тоолврарн хувалцна. .Владимир Воронцовиг мана бичкн, сәәхн балһсна бәәдл зөвәр өврүлсмн тегәд ухан-тоолвран һарһад көгжм үүдәсмн.

Теегин хотл балһсна туск шүлгиг Москва балһсна шүлгч Станислав Волков бичсмн. Келхд, шүлгч мана танһч ирж үзәд уга. Болв мана байн тууж, өвкнрин соньн зан-зангшал, бичкн балһсна туск келвр тодрха шүлг бичх арһ өгсмн.

Владимир Воронцов өвкнрнь циигн улс болжана тегәд көгжмдән өвкнриннь зәрм эв-арһ орулв. Элст балһсннанд йир таасгднаӘ эн балһсла мини бәәдл-жирлһ бат залһлдата гиж Владимир келнә. Эврәннь герин эзн күүкд күн Валентина Николаевналаһан көгжмч жил хооран Москва балһснд таньлдсн болдг. Владимирин дуулдг нертә романс Валентина Николаевна дурта дуудин негнь болжана.

Профессиональн көгжмч Владимир Воронцов сәәнәр гитар цокна, фортепианд наадна. Дууһин репертуарнь зөвәр байн, нурһлж романс тогтана.

Дарани ирлһән Әрәсән композитормудин ниицәнә гешүн Владимир Воронцов хаврин теегт бамб цецг цецгәлх кемлә заллһх седклтә. Кен медхв тер цагт дәкәд чигн шин-шин көгжм, дун үүдәд чигн бәәх гиж композитор тоолжана.

Ээнән Ольга, Колдан Церн