Әрәсәд әрк-чаһр үнтәрв. Тер мет пиив уульнцд болн талдан чигн олн улс цуглрсн һазрт ууж болшго
Давсн нарн өдрәс авн Әрәсәд әрк-чаһр үнтәрв. Урднь өрәл лиитр цаһан әрк йирн нәәмн арслнг күрдг бәәсн болхла. Ода иим әрк зун хөрн тавн арслнг күрхмн. Эннь һурвн евро тогтажана. Өрәл лиитр коньяк ода хойр зун арвн йисн арслнг күрчәнә. Премьер Дмитрий Медведевин зәрлгәр, ода пиив бас әрк-чаһрин чинртә болв. Одва пиив уульнцд, паркмудт ууж болшго болн телевиденьд энүнә тускар реклам өгч болшго.
Элст балһсна нег ик магазинд эд-таврин үнин цаас сольчкв. Июлин нег шин күртл «Зеленая марка» нертә өрәл лиитр әрк зун һу сн арслнг күрдг билә. Ода болхла дөчн арслнгд үнтәрәд, зун далн йисн арслнг күрчәнә. Болв зәрм магазидт шин үн тәвгдв. Элстин нег ик магазинд шин үнин цаасн тәвгдәд уга. Ода зуг бәәрн арһлачнр кеж һарһдг цаһан әрк үнтәрәд, ода өрәл лиитрнь зун зөрн тавн арслнг күрдг болв. Менеджермудын цәәлһсәр, урднь иим продукц хуучн үнәр хулдж авгдсн бәәж. Хулд-гүүлгәнә цутхлнгин администратор Александр Манджиевин келсәр, ода Хонһр нертә әрк зун зөрн тавн арслнг күрчәнә. Урднь йирн нәәмн арслнг күрдг билә.
Болв удл уга иим үн уга болх. Хамгин кимд коньякин өрхл лиитрнь әмтнд хйор зун арвн йисн арслнгар хулдгдх, энүг кеж һарһдг предприятьмуднын үн болхла зун далн дөрвн арслнг тогтах. Иим өслт бас учрта. Иим кеәвр шанһа хазн икүдүлх зура бәәнә, тер мет эн жил Әрәсә нарта-делкән хулд-гүүлгәнә ниицәнд орх зурата. Әрк-чаһр хулддг халхин менеджер Очр Тепкеевин келсәр, ода цаһан әркин үн өсв. Болв шин продукц авч иргдхлә, шин үнәр әрк хулдгдх.
Июлин нег шинәс авн пиив әрк-чаһрин продукцин чинрт болх. Энүг олн әмтн икәр хурдг һазрт, уульнцд, паркмудт, герин өөр, олн патьрта гермүдин подьездмудт болн базрт үүх зөв уга. Болв ода күртл Элстин уульнцд пиив ууудг улс дала, тер тоод энүг баһчуд икәр уужана. Хальмг танһчин әмтнә тоолврар, иим өслтиг урднь кех бәәсмн.
Әркин нү өсхлә, әмтн энүг баһар уухий аль угай? Давсн зун жилин йирдгч жилмүдт пиив кедг заводмуд олра тосхгдсн цагт, цаһан әрк әмтн баһар уух гиж олн әмтн санжала. Болв әрк уулһна кемжән баһрсн уга.
Колдан Наталья, Жамбин Дмитрий, Хулхачин Николай
