Әрәсәд, тер тоод Хальмг танһчд әрк уудг улсин то өсәд йовна
Тер саамд давн жилд соктуһар маши залж йовсн жолачнрас көлтә дөрвн күн әмнәсн хаһцв, кесг күн шавтв. Әрк-чаһр уудг улсин то жил ирвәс Әрәсәд, тер тоод Хальмг танһчд өсәд йовна. Жил болһн Әрәсәд өрәл сай күн әрк-чаһрас көлтә өнгрнә. Әрк уулһар мана орн-нутг түрүн орм эзлжәнә. Роспотребнадзорин йосна то-дигәр күн болһн жилдән арвн нәәмн лиитр әрк ууна. Хальмг танһчд ода дөрвн дундур минһн күн әрк-чаһрас көлтә гемтжәнә.
Эрүл-менд харлһна нарта-делкән организацин то-дигәр әрк-чаһр уулһна кемжән келн-улсин эрүл-мендин халхд ик әәмшг учражана. Ода Әрәсәд тер тоод Хальмг танһчд келн-улсин ун-тохмин ул эвдржәхнь ил. Өдгә цагт әрк уудг улсас ик зунь йирн процентнь баһчуд. Эмчнрин тоолврар, иргчдән иим бәәдл хальмг улсин генетическ сангд му нилчән күргхмн. Танһчин наркологическ диспансерин ах эмч Елена Бадмаеван келсәр, әрк уудг күн үрәд, ахр болзгт әмтн дор орж одна. Толһа-экн көдлдгән уурна. Талдан чигн олн-зүсн гем ирнә.
Жил ирвәс танһчин наркологическ диспансерт бийән эмнүлжәх улсин то өсәд йовна. Дөчн долан наста Виктор Мендыков ода өрк-бүл, өөрхн улс уга үлдв. Бәәдг гер уга. Әркәс көлтә иим му бәәдлд тусв. Виктор Мендыковин келсәр, цергәс бууж ирснә хөөн әрк уудг болв. Хөөннь экләд көдлв. Элст балһснд нәәмдгч микрорайонд бәәсн спиртзаводт көдлжәсн кемд, жалвиг әркәр өгдг билә. Әркд авлгдад, өрк-бүл уга үлдв.
Әрәсән МВД-н то-дигәр, зака эвдсн цуг тооһас найн процентнь сокту улс учрана. Давсн жилин эргцд Хальмг танһчин ГИБДД-н көдләчнр соктуһар маши залж йовсн һурвн минһн күн бәрж авч. Хальмг танһчар ГИБДД-н заллтин әнгин инспектор Василий Кекеевин келсәр, давсн жилд сокту жолачнр орлцата дөнч йисн зеткртә йовдл хаалһд учрсмн. Энүнә ашт дөрвн күн әмнәсн хаһцв, далн нәәмн күн шавтв. Өдр болһн маши залж йовсн арвн сокту күн бәргднә.
Өдгә цагт Әрәсәд әркәс көлтә һурвдгч залу күн болһн болн доладгч күүкд күн болһн өнгрнә. Ода бәәх дөнч наста залу улсас өрәлнь жирн наснд күршго. Сулда нертә медицинск дөн күрглһнә танһчин цутхлнгин һардач Галина Очирован келсәр, ода эмнүлин учрежеднь болһнд эрүл-мендин школ секх зура бәәнә. Энүнд әмтн тәмк, әрк хайж чадх, наркотик олзлдган уурх. Энүнә төлә ода үүлджәх эмнүлин учрежденя материальн-техническ ул батрулх кергтә.
Эмчнрин тоолврар, хальмг күн әрк уухла, әрк удан цогц-махмудас һарна. Эннь келн-улсин йилһлт болжана. Эннь бас учрта, юнгад гихлә мана өвкнр иим икәр әрк-чаһр уудг бәәж. Тегәд өдгәц агин хальмгудт әрк ик хорлтан күргжәнә. Иргчдән эннь бичкдүдин, ачнр-зеенрин эрл-мендин халхд му нилчән күргхнь лавта.
Арстана Светлана, Настан Сергей
