Әрәсәд баһ предприятьмуд хаагджана
Хойр сарин эргцд Әрәсәд хойр зун нәәмн минһн баһ предприять хаагдв, тер тоод хальмг танһчд бас иим предприятьмуд көдлдгән уурв. Энүнә тускар хотл балһсна администрацин туслжм күрглһнә әнгин специалистнр зәнглв. Январин нег шинәс авн киоскмудт пиив хулдшго закан эн туст үлмәһән күргсн уга. Эн халхар көдләч болһна төлә орулж өгх пенсионн даатхлһна мөнгнә кемжән хойр холванд өсв.
Валентина Буйлова арвн һурвн жилдән арһлачин үүлдврәр көдлжәнә. Эн цагин эргцд күнд-түрү тоот дала харһв гиж күүкд күн келнә. Зуг эн жил дегд түрү болжана. Нәәмәдлһнә мөнгнәс болн талдан чигн алвнас даатхлһна мөнгнә кемжән өсв. Арһлач Валентина Бувйлован келсәр, иим ик алв өгдг арһ уга болжана. Арһлачнрин өрәлнь көдлж чадшго. Кергән хаах.
Энүнлә Марина Распутина бас зөвшәржәнә. Сар болһн цуг алвна мөнг өгхин төлә тавн минһн арслнг һарна. Энүнә бизнес цагин кемжәнлә ирлцүлж кегднә. Тегәд ору әдл биш. Арһлач Марина Распутина келсәр, көдләчнин жалв ода дөрвн-тавн минһн арслнг тогтажана. Бидн болхла сардан иим мөнг өгчәнәвидн. Бәәдл-жирһлин хамгин баһ кемжән тавн-зурһан минһн арслнг, бидн болхла сардан иим мөнг оурлж өгнәвидн. Эннь дегд ик болжана.
Дәкәд нег толдад келхлә, эн жилин январин нег шинсә авн көдләч болһна төлә арһлачнр, фермермүд, адвокатмуд болн нотариусмуд урднь арвн долан минһн арслнг орулж өгдг бәәсн болхла, ода һучн зурһан минһн шаху арслнг пенсионн сангд орулж өгх зөвтә.
Эн тооһас һучн хойр минһн эрк биш орулх пенсионн даатхлһан мөнгн, һурвн минһн медицинск даатхлһн. Давсн жилд пенсионн мөнгн арвн долан һар минһн арслнг тогтажала, энүнәс эрк биш даатхлһна мөнгнә кемжән арвн дөврн дундур минһн арслнг күрчәлә. Медицинск даатхлһан мөнгн һурвн минһнд күрв.
Элст балһсна Пенсионн сангин заллтин әнгин ахлач Алина Лиджиеван келсәр, эн жилин эклцәр Элст балһсна заллтд тавн минһн дөрвн зун тәвн арлһач, фермер, адвокат болн нотариус тоод бәәсмн. Ода болхла дөрвн минһн нәәмн зун тәвн күн үлдв.
Пенсионн сангд орулж өгдг мөнгнә кемжән икдснәс көлтә хулд-гүүлгән кисокмуд хаагдв. Элст балһснд бәәсн һурвн зун киоскас ода дөчнь көдлжәхш. Танһчин баһ бизнес дөннлһнә төлә Хальмгин промышленникүдин болн арһлачнрин ниицән дөнцл мөнг өгх селвг орулж өгв. Талдан керг-үүлдврмүд күцәгджәхш. Арһлачнр эврән эн туст седвәр орулж өгчәхш.
Хальмгин промышленникүдин болн арһлачнрин ниицәнә күцәгч директор Вячеслав Санкуевин келсәр, ода мана танһчд эн күнд бәәдләс яһж һархин тускар күүндвр кегджәнә. Мана танһч күцәж чадх үүлдврәс зуг дөнцл мөнг өгч чадх.
Әрәсән правительств иим шиидвр авснь учрта. Арһлачнр пенсионн системд мөнг орулж өгчәхш. Ода зуг һурвн сай күн мөнг орулна. Шинжләчнрин тоолврар эднә то хөрн минһнд күрх зөвтә. Даатхлһан мөнгн алвн биш, эн мөнгн иргч пенсь тогтана гиж пенсионн сангин көдләчнр цәәлһвр кев.
Шаран Баира, Настан Сергей