Әмтиг хуучн гермүдәс нүүллһнә программар Лаганд шин герин тосхлт төгсв

Әмтн шин бүүрт нүүж орсна туск сән зәнгәр эклжәнәвидн. Әмтиг хуучн гермүдәс нүллһнә федеральн программар Лаганск районд шин герин тосхлт төгсжәнә. Тер мет давсн жилин даалһврар һурвн болн арвн зурһан патьрта гермүдт капитальн ясвр кегдв.

Далн хойр наста пенсионерк Нина Федоровна Черняева хойр хората патьрт хамгин түрүн болж нүүж орв. Хөрн патьрта герт тосхлтын көдлмш төгсәд уга болв чигн, цөн өрк-бүлмүд, тер тоод Нина Черняева эврәннь бүүртән адһад нүүж орсмн. Ода тас талдан сән таалд бәәршлхв гиж пенсионерк инәмсклж келнә. У-сарул хорад, энүнә ачнр-зеенр гиичд ирх. Пенсионерк Нина Черняеван келсәр, халун-киитн усн бәәнә. Медәтнрт дәкж юмн керг уга. Көгшрх насндан иим патьр авндан байрлжанав.

ВЗК: Улсиг хуучн нурад унжах гермүдәс нүүлһнә программар эн гериг хойр минһн арвдгч жилд эклж тосхсн бәәж. Ода эн ширдлһнә болн шалдарин көдлмш төгсв. Удл уга гер күцц эдлврт орх. Шин герт дөрвлжн метрнь арвн зурһан минһн арслнг күрчәнә. Эннь кимд гиж әмтн тоолжана. Февралин нег шин нааран цуг өрк-бүлмүд нүүж орхмн. Лагань балһсна администрацин толһач Николай Гиренко келсәр, ода шалдарин көдлдмш төгсжәнә, линолеум делгжәнә. Негдгч давхрт үүд тәвх һурвн патьр үлдв.

Социальн программар тер мет һурвн болн арвн зурһан патьрта гермүдт Лагань балһснд капитальн ясвр кегдв. Энүнд гермүдин ора ясгдв, терз-үүдн сольгдв. Тәвн жилдән капитальн ясвр кегдсн уга. Ода йир сән. Федеральн программд орж эн гер. Хойр-һурвн жилдән ахлачнрт одв. Ода болхла иим сән ясвр кеж. Шин терз-үүд тәвж, ик гидг ханлт өргжәнәвидн.

Хальмг танһчд әмтн бәәдг гермүдин тосхлт жил ирвәс делгрлт авад йовна. Давсн жилд һучн минһн дөрвлжн метр әмтн бәәдг гермүд тосхгдв. ЖКХ-н халх шинрүлһнә сангин делгрлтин программар хальмгт хуучн гермүдт бәәх улсин бәәцин таал ясрулгдх.

Бевина Мергн, Бадмаран Владислав