Үвл кезә Хальмгт ирх?

Үвлин түрүн сарин арвн хонг давж одв. Шин жилин байр күртд хөрн хонг үлдв. Үвлин кем цасн орснас көлтә медгдв. Түрүн орсн цасн ода деерән хааляд, бальчг болсн бийнь, танһчин улс түрүн цаснд байрлжана. Танһчин гидроцутхлнгин тааврар цөн өдр болад йоста үвл Хальмгт ирх. Цасн орх, арвн тавн градус күртл киитрх, салькна күчн чанһрх.

Элст балһсна бәәрн күн Андрей Манджиев хотл балһсна цутхлнгд бәәнә. Өдр болһн һаза һарад цевр аһар киилнә. Энүнә келсәр, декабрь сард болдг тенгрин бәәдл энүнд боомтг болжахш, иим тенгрин бәәдл энүг байрлулжана.

Андрей Манджиевин келсәр, тенгрин бәәдл сән. йоста үвл ода чигн болад уга.

Сүл цагт тенгрин бәәдл сольгдад хур цасн оржана. Иим таалд танһчин хаалһст хальтрата болна. Өрүн эрт һазр көрәд, хаалһс хальтрата болна, өдртнь цас-уснас көлтә бальчгта болна. Эврәннь машиндан рези цаглань сольсн жолачнр ода санамр бәәнә.

Жолач Петр Бедяевин келсәр, цаглань машин рези сольж. Ода санамр йовжана.

Тер бийнь йоста үвл ирхнь өөрдж йовна. Хальмг танһчин гидрометеоцутхлнгин тааврар, цөн өдр болад цасн орад йоста үвлин бәәдл һарх.

Хальмгин гидрометеоцутхлнгин синоптик Надежда Мучаеван келсәр, циклонас көлтә мана танһчд иргч өдрмүдт цасн орх, зәрм һазрар цасн икәр орхмн. Аһарин кемжән сөөднь арвн-арвн тавн градус киитн, өдртнь тавн-арвн градус киитнд күрх. Зәрм ормар цасн орад бәәх.

Декабрин арвн өдриг олн-әмтн дунд үвлин темдг гиж нерәддг бәәж. Эн өдрәс өвәрц бәәдл күлхдг билә, ик оньган өгч эн өдр оддта тенгр, шовудын нислт, үүл шинжләд, сальк сонсдн бәәсмн. Декабрин арвнд өрүн эрт ар үзгәс көдлжәх салькн тал чирәһәрн зогсхла, энүнә цуг хамг му тоот уга болх гиж иткдг билә. Декабрь сарин арвн хонг давж одв. Иим кемд танһчин улс шин жилин байр күләж, үвлин кемд амрх цаг күләнә. Иим цагт цасн бүргәд орхла, әмтн байрлна.

Эн күүкд күүнә келсәр, декабрь сард һарсн өдрән темдглнә. Тегәд декабрин тенгрин бәәдл таасгдна. Эн күүкнә келсәр, цасн орхла икәр байрлна. Цасн икәр орхла сән болх, цаснд көлвәдх дурн күрнә гиж эн күүкн келнә.

Декабрь сард хамгин ут сө болн хамгин ахр өдрмүд болна. Олн улсин келсәр, иим кемд өрүн эрт көдлмштән эс гиж сурһульдан одхин төлә эрт босхд күнд болна.

Елена Алексенко, Эрнжәнә Эрднь