Зурһан поселкд дәәнә ветеранмудын нерд бумбд бичәтә
Йирн негн наста төрскән харсгч дәәнә ветеран Богла Убушиевин нерн чолунд монкинд бичәтә. Баһ Дөрвдә района зурюан посеклин бәәрн улс бумб тосхад, энүнд төрскән харссн Зурһана улсин нер бичв.
Төрскән харсгч дәәнд орлцсн Баһ Дөрвдә района Зурһан поселкин бәәрн хойр зун күүнә нерн эн чолунд бичәтә. Күн болһна нер умшхла, эднә жирһлин адрута хаалһ уханд орна. Дәәнә ветеранмудын нерн заагт Богла Убушиевин нерн бас йовна. Энүнә нернә өөр дәәнд әмнәсн хаһцсн ахнр-дүүнриннь нерд бас бичәтә. Ода күндтә ветеран йирн нег нас зүүв. Зурһан поселкин хамгин көгшн күн ода гертәсн холд һардган уурв. Чикнь хатурад, мууһар сонсна, нүднә харань бас му. Ор һанцхарн бәәх көгшәд дөн болжах бәәрн улсин келсәр, өдр болһн гилтә дәәнә тускар Богла көгшә келж өгнә.
Нег минһн дөчн һурвдгч жилд зун негдгч полкин ханьд Богла Убушиев Сталинград балһснд болсн сүркә дәәлдәнд орлцсмн. кесг орден-медальмудар ачлгдв. Медаль-орден болһна тускар кесгтән келж чадх. Төрскән харсгч дәәнә ветеран Богла Убушиевин тодлсар, Сталинград балһс харссн дәәлдәнд Гумрак станцин өөр хортнла ноолдв. Ода дала цаг болад, зәрмнь мартгдад бәәв. Ахнр-дүүнртәһән хамдан дәәлдв. Цугтан дәәнәс хәрж ирв. Зуг эдн өнгрж одла. Һанцхарн үлдв гиж Богла уйдвртаһар келнә.
Дәәнә хөөн төрскн һазртан хәрж ирәд, чидлән нөөлго көдлсмн. Маши залач, хөөч болн тосхач болх саам учрв. Келхд, бәәдг герән эврәннь һарарн бәрв. Зурһан селәнә бәәрн күн Петр Дорджиевин келсәр, Богла йир цаһан седклтә күн. Олн-зүсн төрәр кергтә сүв-селвг өгнә. Гиичд иртн гиж дуудна. һанцхарн бәәхд күнд болад, күүндх кү хәәнә гиж Петр келнә.
Ачта амрлһнд һарсна хөөн эрүл-менднь муурад, дала гем илткгдв. Энүнә авальн сәәһән хәәсн хөөн, негдгч багин инвалидыг хәләдг күн уга болв. Дәәнә ветеран Богла Убушиевин келсәр, хойр көвүн билә. Негнь сәәһән хәәв. Көвүнь цаг бәәхлә, эцкән золһж ирнә. Ик нас зүүсн көгшәд ода һанцхарн бәәхд күнд болжана.
Тер бийнь Богла гейүрдж, зовлнгдан даргджахш. Дәәнә цагт болд мет батрсн күн ода күнд жирһлән дааж һарчана.
Санкун Кермн, Колдан Церн
