Зунын амрллһна кем йир әәмшгтә кем

Зунын амрллһна кем йир әәмшгтә кем. Һан халун өдрмүдт маши залсн улсин эрүл менднь му болна. Дәкәд болхла эн цагла халлһд учрсн зеткртә йовдлмудын то икгднә. Һол учрин негнь хату девскртә хаалһсин му бәәдл. Дәкәд болхла олн әмтн хаалһсин закан чик кевәр медхш.

Алексей Аполлонский дамшлта Жолач. Балһсна хаалһсар кесг дәкч йовна. Тегәд Элст балһсна хаалһсин дуту дундснь сәәнәр меднә. Хаалһсин ясвр кесгәс нааран кехәд уга гиж жола овлнгарн хувалцна. Алексей Аполлонский келсәр тиим хаалһсар йовхларн машин дангин хамхрна. Жилдән кесг дәкч ясвр кех кергтә.

Дамшлта жолач эврә арһарн ясвр кеж чадна. Болв йоснадан маши хамхрхла дала мөнгн кергтә болна. Сөөһәр йовхларн хаалһсин дуту дундснь үзх арһ уга болна, нүкнд дангин орнач гиж жолач маднд келв. Шам уга хаалһсд көррүлх чигн әәмшг бәәнә. Дәкәд болхлаг хаалһс һатлсн әмтн энд тенд хаалһан һатлад йовна. Зунын амрллһна өдрмүдт маши залсн насни дигт күрәд уга баһчуд олар харһна. Скутерар хаалһ керчәд йовна. Баһ наста көвүд күүкд чигн юмнас әәлго йовна.

Эн зурцас әмтн медрл авх зөвтә. Эк эцкнр болхла күүкд көвүдтән скутер бичә хулдж автха. Өдгә цагт өдрәр асхар чигн баһчуд скутерар йовна.

ГАИ инспекцин көдләч Андрей Сюкиевин келсәр жил ирвәс Элст балһсна хаалһс му бәәдлтә. Энүнә ашт кесг зеткртә йовдл һарна. Сөөһәр тиим йовдлмуд икгднә.

Олн әмтнә ухан тоолврар му хаалһин бәәдләс зеткртә йовдлмуд икгднә. Хаалһсин хату дескр йир му, дәкәд болхла хаалһин закан меддго әмтн маши зална. Үлгүрләд келхлә, хаалһс һатлсн әмтн чигн адһад цагла зеткрлә харһна. Бийән болн өөрхн әлгн садан саглулхин төлә күн болһн хаалһ чик кевәр һатлх зөвтә.

Азыда Надежда, Очра Сергей