ЖКХ-н сангас Хальмг танһчд мөнгн ирх
Жилишн-коммунальн эдл-ахун халх шинрүлһнд дөн күргдг сангин парвлян олн патьрта гермүдт капитальн ясвр келһнә болн хуучн гермүдәс әмт нүүлһнә төлә мөнг йилһж өглһнә эрлһ дөннв. Энүнә ашт мана регионд сангин хазнас олн давхрта гермүдт капитальн ясвр кехин төлә арвн тавн сай дөрвн зун найн минһн арслнг ирх. Бәәрн бюджетас болхла энүнә төлә нәәмн сай долан зун жирн минһн арслнг йилһж өггдх. Эн мөнгиг Городовиковин нертә уульнцин арвн доладгч герт, Һурвдгч микрорайона хөрн дөрвдгч герт, хойрдгч микрорайона һучн зурһадгч герт болн нәәмдгч микрорайона жирн дөрвдгч, дөрвдгч микрорайона хөрдгч герт капитальн ясвр кехин төлә олзлх. Тер мет йирн зурһан сай арслнг әмтиг хуучн нурад унжах гермүдәс нүүлһхин төлә йовулгдх. Энүнә төлә танһчин бюджетас хөрн долан сай арслнг ирх, тер мет иим мөнгн Элст балһсна хазнас һарһж өггджәнә. Иргч хойр минһн арвн дөрвдгч жилд эн мөнгәр шин гермүдт зурһан зун хөрн һурвн күн нүүж орх. Элст балһсна иим гермүдәс нүүлһәд шин патьрт орх. Эннь Элст балһсна Поповичин нертә уульнцин арвдгч, арвн хойрдгч, арвн дөрвдгч, Правда уульнцин негдгч, негдгч А, һурвдгч, тавдгч, йисдгч, арвн негдгч, арвн хойрдгч, арвн һурвдгч А, арвн дөрвдгч, Хомутниковин нертә уульнцин зун арвдгч, зун арвн хойрдгч, хун арвн хойрдгч А, зун арвн һурвдгч, зун арвн һурвдгч А, Очра Номтын уульнцин арвдгч болн нәәмдгч гермүдәс әмтн нүүлһгдх.
