Жил ирвәс Хуучн Шин жилин байр алдршлт авчана

Эндр сө Хуучн Шин жил. Жил ирвәс Хуучн Шин жилин байр алдршлт авчана. Ода олн улс эн байриг йоста байр гиж тоолжана. Пальмовин нертә музейин көдләчнр Элстин хойрдгч школын сурһульчнрин төлә соньн наад үзүлв.

Музейд йоста нәр болв. Дурта туульсин персонажмуд болн Киитн Аав бичкүдиг Хуучн шин жиллә йөрәхәр ирв. Дүр болһн эврәннь билг эрдмән үзүләд, көвүд-күүкдиг байрлулв. Келн-улсин Пальмовин нертә музеин көдләч Ирина Усчееван келсәр, эдн эврә һарарн көстюм уйж авч. Бичкдүдин нәр соньннар давулхин төлә арһ чидлән нөөлгө көдлв.

Сурһульчнр наадад, дурта дууһан дуулад, бииләд, эднд нәр йоста шин байр болж медгдв. Бичкдүдин келсәр, шин жилин байр хойрдгч дәкж давулснднь ик байрта бәәнә. Дәкәд белгүд авх саам учрв гиж эдн келнә.

Керг-үүлдврин йовудт көвүд-күүкдт Хуучн шин жилин туужин тускар өгв. Дәкәд болхла Святки, Рождество, Крещение ямаран кевәр кесг жил хооран әмтн темдглхин тускар тодрхаһар, наадар дамжулад үзүлв. Бичкдүд шунмһаһар нәр-наадыг хәләв, нег үлү зәрм сурһульчнр музеин көдләчнрлә хамдан нааднд орлцв.

Келхд, эн өдрмүдт күүкд улс олн-зүсн эв-арһар белг бәрнә. Хуучн домгар, эн өдрмүдт бәрсн белг эрк биш күцх. Өдгә цагт көзрәр белг бәрнә, кезәнә болхла күүкд һосан хаяд эс гиж хорһн шам хәәлүләд иргчин тускар медж авхар зүткдг бәәсмн. Тер мет Хуучн шин жилин нәр мана орн-нутгин улст дәкәд нег байр үүдәх арһ өгнә.

Шаран Баира, Хулхачин Николай