“Жанһрин ачнр” нертә спортивн клубд Москвад бәәх хальмгуд оржана
“Жанһрин ачнр” нертә спортивн клуб дорд үзгин бөк бәрлдлһнә спотрд дурта улсин хамгин дурта бәәрн болжана. Энүнд Москва балһснд бәәх хальмгуд ирж цогц-махмудан батрулна. Эднәс зәрмнь профессиональн спортсменмүд, талдан улс шинкн бөк бәрлдлһнә спортар экләд соньмсжана. Тер тоод эдн бөк бәрлдлһнә спортд, кикбокиснгд болн каратэд дуран өгв.
Тренер Дмитрий Бадмаев спортд дурта нег һазра улсан хамднь цуглулж чадв. Эдн олн-зүсн халхар көдлжәнә, тер тоод энд тосхачнр, юристнр менеджермуд бәәнә. Валентин Шунгурцыков урднь классическ бөк бәрлдлһнә спортар соньмсжасмн. Танһчин болн цугәрәсн кесг марһаст орлцв. Спортивн клуб ирәд баһ наста спортсменмүдлә дамшлтарн хувалцсн деерән, эврән баһчудас сурһуль авчана.
Валентин Шунгурцыковин келсәр, дөчн жилдән спортар көдлхлә, күцл эврән ирнә. Ода эрүл-мендән батрулх кергтә болжана. Энд көдлжәх бөк бәрлдлһнә секц немр урмд өгнә.
Өдгә цагт дорд үзгин бөк бәрлдлһнә эрдмиг күүкд улс бас дасжана. Полина Ехаева зурһан сар хоорна клубд ирәд, кикбоксингин секцд оржана. Клубд дәкәд чигн күүкд оржана. Энүнә келсәр, секцд дассн эв-арһ цогц-махмуд батрулсн деерән, бийән харсхд сән нилчән күргх.
Полина Ехаеван келсәр, спорт күүнд чидл, омг өгнә. Күнд Москван бәәдл-жирһлд эрүл-менд кергтә. Нааран ирәд, цогц-махмудан батрулжана. Энд эврә һазра улс нөкд болна, дамшлтарн хувалцна.
Тренер Дмитрий Бадмаевин келсәр, эн спортивн клубд әмтн бйиннь төлә көдлжәнә. Зәрм оютнр зөв-йосна органмудт эс гиж йилһән сән цергт церглхин төлә нааран ирәд, цогц-махмудан батрулжана. Бөк бәрлдлһнә клубд боксин эв-арһ бөк бхрлдлһнә эв-арһла хамднь озлж ноолддг эрдм энд дамхжана. Энүнд боксин, кикбоксин болн самбон эв-арһ орна. Тер мет Хальмгин болн Әрәсән нертә спортсменмүд коубд ирәд, мастер-класс үзүлнә, сурһулин семинар бүрдәнә. Кикбоксингин кесг дам нарта-делкән чемпиона Бату Хасиков нааран гиичд дару-дарунь ирнә.
Тренер Дмитрий Бадмаевин келсәр, түрүн авгтна клубын һол күцлнь — әмтн эрүл-дорул кевәр бәәж, цогц-махмудан батрулх төр тәвж. Тер мет дәәчин эрдм дасж автха гиһәд, секц секгдв. Энүнд дала секц көдлжәнә. Олн әмтн ирәд, бөк бәрлдлһнә эв-арһ зааж өгчәнә. Дәәчин эрдмин тускар келж өгнә.
Спортивн клубд күн болһн ирәд, бичгдж чаджана. Москва балһсар йовдг хаалһ ут болв чигн, долан хонгт хойр дәкж нааран олн улс ирж дурта спортарн дамшлтан өөдлүжәнә. Нег үлү, энд хальмгуд нег һазра улстаһан харһад, бүлән күр-күүндвр кеж чадна. Зәрм әмтн шин нәәжәнә энд олж авна. Ода баһчуд хальмг улсин уул авьясас — бүс бәрлдж ноолддг эрдмәр соньмсжана. Төрсккн һазрасн хол һазрт эдн эврә уул зангшалн мартжахш, хальмг улсин кезәнк авьясиг хол һазрт бәрж хадһлжана.
Ээнән Ольга, Очра Сергей
