Зарһин приставмуд маши залачнрас өринь некж авхин төлә долан хонг болһн бүртклһ кенә
Хальмг танһчин зарһин приставмуд маши залачнрас өринь некж авхин төлә долан хонг болһн бүртклһ кенә. Энүнә йовудт машид олар гүүдг Элстин хаалһст һурвн зун автомобиль зогсагдад, өртә улс илткгдв. Тер маршрутн таксин жолачнр ял өглһнә төр бүрткж хәләгджәнә. Эндр иим бүртклһ зарһин приставмуд бас кев. Эднлә хамдан мана үүдәгч баг Элстин хаалһст яһж өртә улсиг илткж өрин некж авчахин тускар хәләв.
Зарһин приставмуд дарани бүртклһ кехләрн, өтә улсин утскар электронн то-диг авч һарна. Специалистнрин келсәр, иим кевәр көдлхлә, көдлмш күцәмжтә болна. Иим эв-арһар цуг өртә улсиг илткж, өринь некж авх арһ бәәнә. Тер тоод алвна, алиментын, ялын, кредитын, ГИББ-н ялын мөнгиг некж авна. СНХ хальмг танһчар зарһин приставмудын заллтын барин церглтин һардач Делгр Бодгаеван келсәр, сүл цагт автовокзалд болн тавдчг тойгта маршрутын зогсалд бүртклһ келәвид. ГИБДД-н ялд унсн жолачнр илткгдв. Хөрн секундын эргцд электронн эв-арһар иим улсиг медж авх арһ бәәнә. нег часин туршарт кесг жолачнр дор ормднь ялан өгв. Хойр күүнд зарһин приставмудт ирх цаасн өггдв. Нег өртә күүнә зөөр бичгдж авгдв. Эн күн мобильн телефоһан өгв гиж Бодгаева зәнглв.
Иим бүртклһнә хөөн жолачнр эврәннь өрән шишлнг цаасар өгнә гиж приставмуд келнә. Энүнд мана үүдәгч баг герч болв. Маршрутн Газельмудын жолачнрин тоолврар, өриг цаглань данцахла сән болна. Блиц 1 — оад деерән нанд өрн уга гиж эн жолач келнә. Өриг цаглань өгх саната бәәнәвидн гиж эдн келнә.
Келхд, цаглань ял эс данцахла, ялын кемжән хойр холванд өснә эс гиж өртә күн арвн тавн хонгар бәрәнд авх закан бәәнә. Иим бүртклһ зарһин приставмуд сар болһн күцәнә. Энүнә ашар бюджетд немр мөнгн орж ирнә. Өртә улс болхла цаглань өрән данцахар зүткнә. СНХ Делгр Бодгаеван келсәр, эн жили н арвн сарин эргцд зарһин приставмуд ГИББД-н хойр сай долан зун минһн арсонг ял некж авгдв. Иим бүртклһн сар болһн кегдх.
Әрәсән закаһар зарһин приставмуд иим бүртклһ кесн цагт өртә улсин зөөриг бичж авч чадх, мобильн телефо, автомагнитол эс гиж машиһинь бичж авх закан һарв. Эннь өрнә мөнгнә кемжәнлә ирлцх зөвтә. Тегәд өрән эрк биш данцахла сән болх, эс гиж цаглань өрән өгхлә улм санамр болна.
