Яшкуль селәнд әмтн шин бүүртән нүүж оржана
Яшкуль селәнд олн үртә найн негн өрк-бүл бәәдг гермүд бәрхин төлә һазрин участк авв. Селәнә делгрлтин программар дәкд арвн тавн өрк-бүл бәәдг гер бәрхин төлә дөнцл мөнг авч чадв. Эднә зәрмнь шин бүүрт нүүж орв.
Цөн сарин эргцд Юрий Гашуновин герин өөр йоста бәәшнг тосхгдв. Давсн жилд селәнә делгрлтин программар Гашуновихн гер бәрхин төлә мөнг авсмн. Федеральн, танһчин болн бәәрн бюджетмудас эднд долан зун минһн арслнг йилһж өггдв. Герин эзн келсәр, үвлин киитн күртл герин эрс болн ораһинь тосхж чадв. Үлдсн көдлмшиг дулархла кех саната.
Юрий Гашуновин келсәр, эн программин тускар сонсчкад, эрлһ орулж өгч. Мөнг авсн хөөн эврәннь герән экләд тосхв. Эн жилин чилгч күртл тосхлт төгсәһәд, шин бүүрт нүүж орх зура бәәнә.
Ода болхла Гашуновихна өрк-бүл хуучн гертән бәәршлжәнә. Хойр хорад герин эзн, энүнә авальнь, һурвн күүкднь бәәнә.
Айтан Гашуновин келсәр, шин герт цуг хорасиг хуваһад авчкв. Балкон бәәсн хйордгч давхрт хора шүүж авч. Баатр энүнә өөр талдан хорад бәәх. Бичкн дүнь негдгч давхрт бәәхәр шиидв.
Владимир Печень болн энүнә өрк-бүл болхла шин гертән нүүһәд орчкв. Энүнә аваль Лариса бәәрн школд багшар көдлжәнә. Баһ наста специалист болад, дөнцл мөнг авч чадв. Эн мөнгәр шин гер тосхж авх арһ учрв. Владимирин келсәр, ода эврәннь төрскн селәнәсн нүүх керг уга. Энд цуг кергтә бәәцин таал бәәнә.
Владимир Печень келсәр, Яшкуль селән энүнә төрскн һазр. Авальнь бас эндәс. Тегәд эврәннь герән тосхж авхар шиидв. Программ сән дөн күргв. Ода авальнь байрта бәәнә. Шин герт бәәцин цуг таал бәәнә. Орм дала. Бичкдүд бас байрлжана.
Селәнә делгрлтин программар сүл жилмүдин эргцд Яшкуль селәнд бәдг гер тосхж авхин төлә арвн тавн өрк-бүл дөнцл мөнг авв. Найн негн олн үртә өрк-бүлд болхла бәәдг гер тосхж авхин төлә һазрин участк йилһж өггдв.
Яшкульск РМО-н администрацин архитектор Юрий Цохоровин келсәр, эн һазрт найн негн өрк-бүлин төлә найн нәәмн һазрин участк йилһж өггдв. Долан өрк-бүл хойр һазрин участк авч чадв. Эн программар энд инженерн залһлдан татгджана. Тегәд эн гермүдт цуг кергтә коммуникац ирх. Тер тоод электрокүчн, газ орулгдх. Ода деерән зуг усн уга.
Федеральн шишлнг программ күцәснәс иштә баһ наста өрк-бүлмүдиг бәәдг гермүдәр тетклһнә төр хаһлгджана гиж района администрацд келнә. Ода эдн төрскн селәнәснь нүүж йовжахш. Тегәд баһ наста өрк-бүлмүд төрсн, өссн-боссн һазртан көдләд, района делгрлтд эврә тәвцән орулжана.
Елена Алексенко, Очра Сергей
