Яшалтан района больницд инфекционн әнгд 4 наста күүкн әмнәсн хаһцв

Эндр сөөһәр Яшалтан района больницд инфекционн әнгд дөрвн наста күүкн әмнәсн хаһцв. Дәкәд тавн бичкдүд больницд эмнүлһ авчана. Цуг эн көвүд-күүкд «Байр» нертә бичкдүдин садт оддг бәәсмн.

Мартын З1-д Яшалтын района больницин инфекционн әнгд хойр бичкн күүкн тусв. Апрелин һурвнд болн дөрвнд дәкәд 4 күн.

Роспотребнадзорин специалистнр темдглсәр, урдаснь кесн шинжлтәр бичкдүдт ротавирусн инфекц хальдв. Күүкд-көвүд халу дүрәд, бөөлжәд бәәв. Эн района больницин ах эмч Юрий Кекеновин зәнглсәр, ода күүкдин бәәдл невчк ясржана. Эмнүлин учрежденьд күүкд туссн «Байр» нертә бичкдүдин садт оддг бәәсмн. Хордсн бәәдлтә бичкдүд эн өдрмүдт больницд орсн бийнь эн дошкольн учреждень карантинд зуг өцклдүр апрелин 4-д хаагдв.

Роспотребнадзорин заллтин һардач Константин Яшкуловин келсәр, шинжлт кеснә ашт му чинртә хот-хол илткгдсн уга. Тегәд эн туст көдлмш цаарандан кегджәнә.

Тер хоорнд сүл дәкж 2010-гч жиллә энд эн ведомствин специалистнр шинжлт кесн билә. Тиигхд эн садт бәәдл санитарн кемжәнлә ирлцәтә билә.

Роспотребнадзорин заллтин һардач Константин Яшкуловин келсәр, һурвн жилин эргцд нег дәкж бүртклһн кегднә. Прокуратурин даалһврар одахн мартын 27-д эн дошкольн учрежденьд одж шинжлт келәвидн, дуту-дундс илткгдсн уга.

Хальмгин мөшклһнә заллтын һардач Денис Минина келсәр, Яшалтан районд болсн йовдлын тускар роспотребнадзорин специалистнр өцклдүр зәнглв. Тегәд эн туст хәрүһәс сурврмуднь олн болжана. Эн бичкдүдин садт 4 наста күүкн хорсна хөөн эн йовдлын тускар цуһар медв.

Денис Минина келсәр, дегд ора эн йовдлын тускар маднд зәнг орж ирв. Иим йовдл учрсн ашт гем һарһсн улс шоодврла харһулгдх. Уголовн керг күцәгдх.

Эндр мөнклһнә заллтын көдләчнр Яшалтын районд һарч йовв.

Санкун Кермен, Очра Сергей