Владимир Путин Элст балһснд селвлцә кев

Әмтиг хуучн нурад унжах гермүдәс нүүлһнә программиг хойр минһн арвн доладгч жилин сентябрь сар күртл хооран саах шиидвр авгдв. Энүнә тускар Элст балһснд Әрәсән президентин һардврт болсн селвлцәнә йовудт зәнглгдв. Эннь бас учрта. Бәәрн бюджетмуд иим ик мөнг йилһж өгч чаджахш. Әрәсән финансин министерств регионмудыг дөннв.

Хальмг танһчд ирсн кемд Владимир Путин Элст балһсна цутхлнгд бәәх хуучн герт одв. Бәәцин таалас энд зуг киитн усн ирнә, туалет һаза бәәнә гиж хойр давхрта герин эздүд Президентд келж өгв. Эднә төрмүдиг халһх кергтә гиж Путин эдниг иткүлв. Шин герт цуг бәәцин таал бүрдәгдх гиж эн темдглв. Энүнә хөөн Әрәсән толһач Элст балһсна хойрдгч микрорайонд тосхгдсн арвн нәәмн болн зурһан патьрта гермүдт одв. Эн гермүдиг әмтиг хуучн гермүдәс нүүлһнә программар хойр минһн арвн хойрдгч жилд тосхв. Бәәрн улсин келсәр, шин патьрмудан кесг жилдән күләв. Иим бәәцин сән таалта гермүдт нүүлһснд ик ханлтан өргжәнә. Эн медәтин келсәр, хөрн тавн жилд шин бүүр күләв. Путина темдглсәр, ода шин бүүрт орснь сән керг.

Владимир Путинла ахрар күүндсн хөөн, бәәрн әмтн Әрәсән һардачд хамльгин авьясар цаһан хаалһ дурдв.

Хуучн гермүдәс әмт нүүлһнә программ тавн жилдән үүлджәнә. Эн цагин эргцд федеральн бюджетас зун жирн жува арлснг йилһж өггдв гиж эн төрәр болсн селвлцәнд келгдв. Һурвн зун дөчн атвн минһн күн шин гермүдт нүүж орв. Ода үлдсн хойр жилд иим программар хуучн гермүдәс долан зун минһн кү шин бүүрт нүүлһж орулх кергтә. Иим улсиг нүүлһсн цагт хуучн герт кедү жилд бәәсинь тоод авх кергтә.

Владимир Путина келсәр, иргч һурвн жилд хуучн гермүдәс әмт нүүлһх региональн программ Әрәсән субьектмуд батлж авх зөвтә билә. Эднд эн жилин апрелин арвн тавн күртл болзг өгсн билә. Ода болхла зуг һурвн субьект иим программ батлж авла. Яһад иим бәәдл тогтсмн? Алексей Орловин келсәр, апрелин арвн тавн күртл батлж авх програмин тускар келхлә, өцклдүр Константин Цицинла иим зөвшәлт батлж авлавидн. Тегәд мана танһч болн ЖКХ-н санг хоорнд зөвшәлт бәәнә. Зун нәәмн патьрта герин тускар келхлә, энүнд хуучн долан герәс әмтн нүүж орх зөвтә. Шин гериг эн жилин сентябрин хөрн нәәмнд эдлврт орлух зура бәәнә.

Ленина нертә уульнцин һурвн зун йисдгч болн талдан чигн долан хуучн олн давхрта гермүдт бәәх әмтн Калачинская уульнцд тосхгджах шин зун нәәмн патьрта герт сентябрин хөрн нәәмнд нүүж орх зөвтә. Эннь федеральн программд орсн Хальмг танһчд ор һанцхн эдлврт орулгдад уга обьект болжана. Жилишн тосхлтын делгрлтд дөн болжах федеральн сангин генеральн директор Александр Бравермана цәәлһсәр, ода худл, мек-тах кедг подрядчикүдәс харслһна закан өдгә цагт белдж авгджана. Селвлцәнә ашт Президентин келсәр, хуучн гермүдәс әмт нүүлһнә программиг хооран саах болн мөнгәр тетклһнә төриг хаһлх даалһвр правительствд өгхән медүлв. ЖКХ-н халх шинрүлһнә сангин һардач Константин Цицина келсәр, федеральн болн танһчин бюджетмудас әдл мөнг орж ирх зөвтә. Эннь регионмудт невчк гиигн болх.

ЖКХ-н халх шинрүлһнә сангин генеральн директор Константин Цицина келсәр, негдвәр, регионмудт мөнг йилһж өгхд невчк гиигн болх. Энүнә тускар шиидвр батлж авгдв. Регионмуд мөнг баһар йилһж өгх, сангин көдлмш дәкәд күсдундур жилд хооран саагдв. Эннь ик чинртә керг. Иргч һурвн жилд сүл тавн жиллә дүнцүлхлә хойр холванд икәр улсиг шин гермүдт нүүлһж орулх төр тәвгджәнә. Президент энүг дөннв.

Элст балһсна администрацин толһач Артур Дорджиевин келсәр, Калачинск уульнцд тосгджах шин гериг олн-зүсн учрар эдлврт орулж чадсн угавидн. Президентин даалһврар, зун нәәмн патьрта шин герт әмтн эн жилин сентябрь сард нүүж орх зөвтә.

Дәкәд нег тодлад келхлә, Хальмг танһч ЖКХ-н халх шинрүлһнә сангин программд хойр минһн нәәмдгч жиләс авн орлцжана. Өдгә цагт хойр минһн арвн һурвдгч —арвн тавдгч жилмүдин программ тогтагджана.

Татьяна Гюзяляева, Дмитрий Ивахненко