Университетд приемна комиссь көдлмшән эклв
Школан төгсәсн баһчудын нәр-наадн төгсв. Ода көвүд-күүкд альд сурһуль дасхин тускар ухалжана. Чик шиидвр авхин төлә дала цаг үлдсн уга. Арвн негдгч классин сурһульчнр ямаран эрдмәр деед сурһульд сурхин тускар шиидвр авсн болхла, приемн комиссь шинкн экләд көдлжәнә.
Хальмг танһчин школан төгсәсн баһчудас ик зунь ямаран эрдмәр сурхан шүүһәд авчкв, ямаран деед сурһульд орха бас меднә. Деед сурһуль төгсәснә хөөн көдлмш олж авх эрдм көвүд-күүкд шүүж авчана. Тер мет Хальмгин университетд сурх баһчуд бас олн. Теднә тоод Санл Гогаев. Залврин болн зөвин фаультетд сурхар көвүн шиидв.
Санл Гогаевин келсәр, энүнә өрк-бүлд цуһар технологин эрдм шүүж авч. Би болхла юристын эрдмәр сурх санатав гиж Санл келнә.
Арвн тавн наста Артем Кличев болхла йисн класс төгсәв. Дунд эрдмин факультетд документан өгч чаджана. Шинкн экләд көдлжәх приемна комиссьт энүнд цуг кергтә цәәлһвр өгв. Артемиг һазрин болн зөөрин хәрлцәнә эрдм соньмсулв. Энүнә нәәж Александр Горяев болхла компьютерн системд программированя эрдм шүүж авв. Иим эрдм түрүн болж секгджәнә. Иим эрдм хамгин кергтә болн сән жалвта гиж Александр тоолжана. Ах болзгт эврәннь кергтән байн дамшлт хоршаж чадх гиж нәәлжәнә.
Александр Горяевин келсәр, өдгә цагт компьютер угаһар бәәж болшго. Эн факультетд элгн-саднь болн нәәжнрнь сурчана. Тегәд компьютерн системин программированя эрдм шүүж авч.
Хальмгин университетин ректор Бадм Салаевин келсәр, ода абитуриентнр нурһлж документан юристын, эклномикин, бизнес-информатикин болн менеджментин эрдм дасхар орулж өгчәнә. Эн жил приемна комиссин бүрдәмжин көдлмшт сольвр орулгдв. Салу оютнрин комиссь тогтах шиидвр авгдв. Энүнә ханьд Хальмгин университетд сурчах көвдү-күүкд оржана. Эдн школан төгсәсн бачһудт факультет шүүж авхд дөн болх, иргч эрдмин утскар цәәлһвр кех, негдгч курсын оютнр ямаран төрмүдлә харһхин тускар келж өгчәнә.
Эн жил дәкәд нег шин эв-арһ орулгдв. Эннь эрдм-сурһулин кредит. Мөнг өгәд сурх баһчудт өгья мөнг өгхин тускар Хальмгин университет танһчин нег банкла зөвшәлт батлж авсмн.
Ээнән Делгр, Котина Валерий
