Уйн наста бөкнр белдвр кежәнә
Хойр минһн арвн һурвдгч жилд олимпийск көрнгин танһчин школын бөкнр сән үзмж бәрв. Хальмгин бичкн бөкнр цугәрәсән болн нарта-делкән марһаст орлцад, дииләчнрин болн призермудын тоод орв. Эн жил школын арвн хойр спортсмен вольн янзар бөк бәрлдлһнә бөдүн улсин негдгч разрядын кемжәнд күрв. Тер мет уйн наста көвүд бас сән күцәмж бәрв. Танһчин бичкн бөкнр марһанд ямаран белдвр кежәнә? Уйн наста спортсменмүдин олимпийск нааднд Әрәсән командын ханьд орх арһ бәәну аль угай?
Мана үүдәгч баг ирсн кемд спортсменмүд дасхл кежәсн бәәж. Эннь нег өдрин эргцд хойрдгч дасхл болжана. Ода бөкнр эврәннь дассн диг-даранд оржана. Өдр болһн көләсн асхад дасхл кежәнә, хот-хоолан кемжәһәр уужана. Намрин арлһна кемд хоршасн үлү килограммиг ода баһрулх саната. Сергей Манджиев олимпийск көрнгин школын вольня нзар бөк бәрлдлһнә билгтә бөк. Һурвдгч класст сурчаһад бөкнрин секцд ирв. Ода Өмн үзгин федеарльн округин зурһан дам призер болн цугәрәсән дөрлдәнә призермудын тоод орв.
Сергей Манджиевин келсәр, долан жилдән бөк бәрлдлһнә спортар соньмсжана. Энүнә түрүн тренернь Анханов. Зурһадгч класст сурчаһад нааран ирв. Эн жилмдүин эргцд сән күцәмж бәрв. Академьд тавн жилдән бәәнә. Ода энд бәәһә бәәж дасв, сурһулян чигн сәәнәр дасжана.
Эрднь Марчеловин келсәр, урдк кевәр цогц-махмудан чанһаж авхин төлә энүнд дөрвн өдр кергтә. Намрин амрлһна өдрмүдт төрскн һазртан Чилгр селәнд одв.
Бөк Эрднь Марчеловин келсәр, долан настаһасн авн бөк бәрлдлһәр экләд соньмсв. Энүг школьн тренер секцд йовулв.
Олимпийск көрнгин бичкдүдин школын көдлмшин һол күцлнь — бөкнр сән үзмж бәрх зөвтә. Энүнә төлә өдрә шишлнг диг-даран бүрдәгдв, хот-хол кемжәлгдж өггднә. Болв хамгин һол кергнь — өдр болһн дасхлд орлцад, дамшлтан өөдлүлх кергтә.
Бичкдүдин школын директор Олег Балдашиновин келсәр, баһ наста бөкнрин цогц-махмуд батрулх кергтә, эдн чидлтә болн олмһа болх зөвтә. Тиигхлә иргч хойр минһн арвн дөрвдгч жилд сән үзмж бәрәд, шүүврин ашар Әрәсән хамцу командын ханьд орх күцл тәвгджәнә. Әрәсән командын ханьд иргч жилд Китдин орн-нутгт болх уйн наста олимпийск нааднд орлцх арһ хәәх кергтә.
Школын бичкн бөкнрин өмн ик чинртә күцл тәвгджәнә. Тегәд хальмгин бөкнр төрскн һазрин нерән холд туурулх нәәлвр бәәнә. Олимпийск наадн күртл дала цаг үлдсн уга. Уйн наста спортсмнмүдин зунын олимпсйк наадн китдин орн-нутгт иргч хойр минһн арвн дөрвдгч жилд август сард болх.
Батан Санжирма, Хулхачин Николай
