Удл уга Элст балһснд цецгүдин һәәхүл болх
Цецгүдин Элст балһсна бал нертә һәәхүл марһанд эн өдрмүдт хотл балһсна эрдм-сурһулин заллтд белдврин көдлмш гүргүдән. Иим сән зангшалд тохрсн керг-үүлдвр Элст балсһна сән өдрлә ирлцүлж жил болһн күцәгднә.
Эн жил һәәхүл-марһан Пальмовин нертә келн-улсин музейд болх. Энүнд шүүврин девснгин хөөн, марһанд орлцх улсин нерд медгдхмн. Элст балһсна мэрийн эрдм-сурһулин заллтин ах специалист Эрика Дарминован келсәр, эн жил марһан ке-сәәхн болх зөвтә. Энүнд олн улс ирж орлцад, эврәннь үүдәврмүдән үзүлж чадх.
Һәәхүлд цецгүдин багла, әмд болн хагсу цецгүдәс нәәрүлсн кец авч ирж болх. Тер мет һәәхүл-марһанд орлцсн цуг әмтн эврәннь көдлмшин тускар келж өгх кергтә. Иим келвр кехд нег минут өггджәнә. Марһана дииләчнриг кесг номинацар шүүж авхмн. Хамгин түрүнд хамгин сән багла эс гиж шииртә савлд, талдан чигн савд тәвгдсн цецгүдин кец шүүж авгдх зокал бәәнә. Энүнә хөөн кеерүлмжд орулггдг цецгүд эс гиж хувцна ке-янзиг цецгүдәр кеерүлһнә көдлмш үзүлгдхмн. Тер мет нег цецг кеерүлж сәәхрүлһнә үүдәвр бас шинжлгдх. Дииләчнр дипломар болн мөнгнә мөрәһәр ачлгдхмн. Элстин эрдм-сурһулин заллтин ах специалист Эрика Дарминован келсәр, иим керг-үүлдврин һол күслнь — сурһульчнр, багшнр, эк-эцкнр дундас цецгүд урһадг билгтә улсиг йилһж авлһн болжана. Һәәхүл-марһанд Элст балһсна талдан чигн әмтн орлцж чаджана. Энүнд орлцсн әмтн шин болн өвәрц кев-янз үзүлх зөвтә, зангшал, сойл яһж олзлснь бас үнлгдх.
Дәкәд болхла һәәхүл-марһан болсн өдр Элст балһсна Диилврин талвнгд Артстрит нертә уульнцин бииһин фестиваль болх. Энүнд Элст балһсна әмтн болн гиичнр орлцж чаджана. Энүнә төлә сентябрин арвн һуврн күртл эрлһ орулж өгх кергтә.
Ээнән Делгр, Хулхачин Николай
