Төрскән харсгч дәәнә ветеран Елизавета Николаевна Чонаева удл уга йирн жилин өөнән темдглхмн
Дән болн күүкд улс негдүлж болшго санан болжана. Удл уга төрскән харсгч дәәнә ветеран, зенитчиц Елизавета Николаевна Чонаева йирн жилин өөнән темдглхмн. Дөчн һурвдгч жилин намрар Елизавета Чонаева хойрдгч Белорусск фронтын зенитн-артиллерийск полкд экләд дәәлдсмн. Дәәнә хөөн Хальмг танһчин босхмж орлцла, пенсьт һартлан хулд-гүүлгәнә халхар кесг жилдән чидлән нөөлго көдлв.
Дәәнә цагин тускар келхләрн, тиигхд баатр зөрмг йовдл һарһсн тускар сандго биләвидн гид ветеран келнә. Өдр болһн немшин авиацин дәврлһ зогсаһад дәәлдх кергтә билә, талдан санан ордго бәәсмн. Дөчн һурвдгч жилин намрар Елизавета Чонаева хойрдгч Белорусск фронтын зенитн-артиллерийск полкд экләд дәәлдсмн. Дәәчнрин багд арвн күүкд орв. Эдн цугтан әмән әрвллго дәәлдсмн. Түрүн дәәлдәг сәәнәр тодлнав, немшин авиацас тагт харславидн гиж Елизавета Николаевна келнә. Дәәнә ветеран Елизавета Чонаеван келсәр, Сош һолд тәвгдсн тагт харсж. Фронт эднәс хөрн-хөрн тавн дуунад билә. Өөрхн цугнь үздг бәәж. Өдр сө уга гилтә дәәлдән болв.
Дәәлдәнә завсрт баһ наста күүкд зер-зев вагонмудас буулһж йовсмн. Дәәнә цагт зәрмдән байрлх саам чигн учрдг билә. Февралин хөрн һурвн байрин өдр темдглсинь йир сәәнәр тодлна. Тиигхд цуг полкарн байрлад, икәр шуугад нәәрлв. Эрк биш диилвр бәрхвидн гиж санад эн сән өдриг темдглсн биләвиджн гиж Чонаева келнә. Дәәнә ветеран Елизавета Чонаеван келсәр, энд дәәлдж йовсн тов дегд ик бәәж. Сумнь арвн зурһан дундур килограмм татдг билә. Иим күнд сум өдр болһн вагонас бүүлһдг биләвидн.
Болв дөчн дөрвдгч жилин март сард энүг талдан хальмг улсла әдл фронтас буулһад, арвн һурвн жилдән хол киитн Сиврт нүүлһв. Фронтын хөөн бүкл жилдән сөөднь сүркә дәәлдән зүүднднь ордг бәәж. Сиврин тууврин хөөн өрк-бүлтәһән төрскн һазртан хәрж ирв. Дәәнә хөөн Хальмг танһчин босхмж орлцла, пенсьт һартлан хулд-гүүлгәнә халхар кесг жилдән чидлән нөөлго көдлв. Елизавета Чонаеван келсәр, ода тер цаг тодлхла заядар нүднәс нульмсн асхрна. Мана батарей иим бәәсмн. Нег командир, талдан улс цугтан күүкд улс йовла. Энүнә тускар кино бәәнә, мана батарейла әдл, иим бәәдл үзүлжәнә.
Елизавета Николаевнала хамдан нер туурсн хальмгин зенитчиц Мария Зулаева, Араша Босхомджиева, Цаһан Кедеева, надежда Инджиева болн нань чигн күүкд улс дәәлдж йовла. Борис Васильевин бичсн “А зори здесь тихие” нертә түүк эднә хамгин дурта литературн үүдәвр болв. Ода дәәнә ветеран Елизавета Чонаеваг энүнә күүкднь, тавн зеенрнь болн дөрвн зеенчнрнь байрлулж, күндлжәнә. Хамгин отхн зе күүкнь ээжиннь Елизавета нер зүүжәнә.
Бевина Мергн, Очра Сергей
