Төрскән Харсгч Алдр дәәнә ветеранд федеральн программар герин таал ясруллһна мөнгн өггджәхш

Приютненск районд бәәх Төрскән Харсгч Алдр дәәнә ветеранд федеральн программар герин таал ясруллһна мөнгн өггджәхш. Бүкл жилдән дәәнә ветерана өрк-бүл кесг эрлһнә цаас бичв, болв эднә зовлн тер кевтән үлдв. Шидр эн хурц төрәр района прокуратур бүртлһнә көдлмш күцәв.

Найн тавн нас зүүжәх Төрскән Харсгч Ветеран Анацкий Михаил эндр өдр Лидия авальтаһан, Александара күүктәһән, зе күүктәһән хуучн герт олн жилдән бәәнә. Энд балһсна әмтнлә әдл гер дотр бәәх уборн, халун болн киитн усн уга. Усан эдн һаза бәәх худгас авна. Дөрвн жилдән мана орн нутгиг хортнас харсад көгшрх насндан иигәд бәәхв гиж нам сансн уга гиж маднд дәәнә ветеран келв. Сүл жилмүдт көл һар шарклад өвднә, тегәд үвлин болн намрин цагт һазаран һархш.

Давсн жилин хаврар дәәнә ветеран герин тускар Приютненск района прокуратурт бичг бичв. Болв дәәнә ветерана бичсн дуудвриг Приютненск СМО—н һардачнр оньгтан авсн уга билә. Тегәд арһ уга болад дәәнә ветерана элгн саднь прокуратурт бичгән илгәв.

Бидн эн цагин эргцд кесг цаас цуглурад гүүвүвидн. Болв мана керг ормасн көндрсн уга. СМО-н ахлачнр эн тускар маднд иигж келв, маднла хамдан бәәх күүкн, би болн мана бичкн зе күүкн дәәнә ветерана өрк бүл болжахш.

Тегәд мадн арһ уга болад Приютненск района зарһт одад эврәннь зовлнгарн хувалцвидн. Района зарһчнр мана дуувриг оньгтан авч дөн еөкдән күргв гиж медәт келв. Приютненск района зарһин прокуратурин нөкч Виталий Брацило келсәр эндр өдр эн өрк бүлин тускар бүртллһнә көдлмш күцв. Энүнә ашт дәәнә ветеранд шин гер хулдж авхд 772 минһн арслнг йилһж өггджәнә. Приютненск районд бәәх 27 ветеранмудас эн ветеранд Приютненск Селәнә муниципальн бүрдәцин ахлачнр зөвән өгсн уга.

Эн жилд 28 дәәнә ветеранмудт шин гер авхд эс гиж хуучн герән асһх шишлнг мөнгн йилһж өггдв. Эн туст Әрәсән федеральн бюджетас 21 сай арслн һарһгдв. Тиим шишлнг мөнгн өрк бүлин күн болһн патьрин 18-с баһ квадратн метр аһута болхла тиим инвалидмудт закаһар мөнгнә дөн күргдх зөвтә.

Эндр өдр мана танһчд патьрин таал ясрулх күслтә инвалидмудын чеерүдт 79 күн зогсчана. Эн керг үүлдврт 60 һар сай арслнг мөнгн кергтә болжана.

2011 жилд танһчин прокуратурин органа хайгар 2З дәәнә ветеранмудын болн орлцачнрин патьрин йосна зака эвдлһнә туск эрлһ цаас орулгдв. Зарһин шиидврәр 14 күүнә патьрин туск төр сән аштаһар хаһлгдв. 2012 жилд 2 ветерана зөв шинәс хәләгдж босхгдв.

Татьяна Зубцова, Дмитрий Джамбинов