"Тюльпанчик" ансамбль хөрн жилин өөнән темдглжәнә
Эн жил “Тюльпанчик” нертә бичкдүдин бииһин ансамбль хөрн жилин ончта өөнән темдглжәнә. Хальмгин бичкн артистнр Әрәсән болн нарта-делкән марһаст олн диилвр бәрсмн.
Өдр болһн гилтә репетиц, концертмуд болн гастрольмуд болна. Эдн йоста профессиональн артистнрла әдл көдлжәнә. Тер тоод “Тюльпанчик” бичкдүдин ансамбль өөдән билг-эрдмәрн йилһрнә. Ансамблин түрүн хань бас ик билгтә бәәсмн. Энүнд тиигхд зуг арвн тавн күн оржала. Болв нег жил болад, олн концертмудын хөөн бичкдүдин ансамблин тускар танһчин улс сәәнәр меддг болв.
Тюльпанчик ансамблин бичкдүдлә көдлжәх Ольга Кектышеван келсәр, эн коллектив энүг жирлһин хаалһд орулв. Школан төгсәсн хөөн дурта эрдмән шүүж авхд күнд болсн уга. Москван сойлын институтд орад сурһуль сурв. Деед сурһуль төгсәчкәд, эврәннь коллективдан хәрж ирж көдлв. Энүнә тускар кесгәс нааран ухалжасмн. Хамгин түрүнд эврәннь багшнртан, кесг жилин туршарт ансамбль һарджах Людмила болн Евгений Толкачевихнд ик ханлтан өргжәнә. Эдн дурта эрдмдән цуг арһ чидлән тусхаж көдлжәнә. “Тюльпанчик” бииһин ансамблин һардач Людмила Толкачеван келсәр, Ольга Кектышеваг ик кезәнәс авн меднә. Эн күүкд күн көдлмштән йир дурта күн. Энүнд бичкдүд йир дурта.
Баһ наста багшин келсәр, эн жилмүдин эргцд эврәннь ансамблин күцәмжиг шинжлж хәләв. Коллективд үйнр сольгдсн бийнь, ансамблин билг-эрдм дор орсн уга. Ода деед сурһульд авсн медрлиг бәәдл-жирһлд тохрахдан белн бәәнә. Ольга Кектышеван келсәр, эврәннь экнр коллективд көдлхд йир күндтә болсн деерән, ик дааврта болжана.
Сән үзмж бәрхин төлә чидлән нөөлго көдлх кергтә. Ода Тюльпанскин ханьд школ-студь үүлджәнә, кесг насна багмуд бәәнә, ут-тоодан зун бичкдүд оржана. Ансамбльд орх улсин то дегд ик. Шүүврин ашар ансамбльд орсн көвүд-күүкд икәр байрлна. Коллективд үлдәд, сәәнәр биилхин төлә дигтә-даратаһар сурх кергтә. Түрүн болж бииһин эрдм дасжах бичкдүд энүнә тускар сәәнәр меднә. Эс гиж талдан өвәрц һазр — Париж, Рим, Багдад балһсдт одх санан күцшго. “Тюльпанчик” ансамбльд эврән орх саната бәәж. Өрхл жилдән би биилдг дасчана. Энүнд цугнь таасгджана.
Давсн жилд олн-зүсн ончта йовдл учрв. Владимир Спиваковин үрврәр, "Тюльпанчик" ансамбль "Москва встречает друзей" нертә нарта-делкән төсвд орцла. Эднд концерт секх күндтә зөв өгсмн. Дәкәд нег ончта диилвр бичкдүдин коллектив Париж балһснд бәрв. Эдн “Парижские звезды” нертә фестивалин Гран-при шүүж авчла. Иим күцәмж бәрхин төлә көвүд-күүкд икәр көдлнә. Хальмгин билг-эрдмиг цуг нарта-делкәд түүрулжах ансамблиг эк-эцкнрин тоолврар, танһчин һардачнр болн арлһачнр дөннх зөвтә. Людмила Манджиеван келсәр, ансамблин артистнрт хувц-хунринь шинрүлх кергтә. Энүнә төлә мөнгнә дөн сән болх билә. Олн-зүсн марһаст бичкдүд Хальмг танһчин нер харсна.
Дәкәд нег тодлад келхлә, эн жил бичкдүдин коллектив ончта өөнән темдглх. Тюльпанчик эн жил хөрн жилин өөнән темдглжәнә.
Чучян Валентина, Хулхачин Николай
