Троицкое селәнд шин районд газ ирх
Троицкое селәнә нег шин районд удл уга газ ирх. Энд түүмр унтралһна церглтин көдләчнр һазрин участк авсмн. Дула өглһнә кем күртл эдн кимд түләтә болх. Энүнә тускар мана сюжетд келгджәнә.
Түүмр унтралһна церглтин көдләчнрин кварталд зун далн һазрин участк бәәнә. Энүг селәнә делрглтин программар шинкн өрк-бүл тогтсан баһ наста специалистнрт йилһж өгсмн. Хамгин түрүнд Троицкое селәнә түүмр унтралһан әнгин көдлхчнр участк авв. Энд тавн уульнц тогтв — Огнеборцев, Баклановин, Зая-Пандитан, Тундутовин болн Доржиновин нертә улуьнцс.
Троицкое СМО-н администрацин толһачин үүл даажах Владимир Болдыревин келсәр, селәнә делгрлтин программар һазрин участк йилһж өглә. Баһ наста специалистнрт болн баһ наста өрк-бүлмүдт. Ода түүмр унтралһна көдлчнрин квартал өсжәнә.
Саглр Настаева хамгин түрүнд энд һазрин участк авад, гер бәрж авч. Болв газ уга болад шин бүүртән эн зунар нүүж орв. Троицкое СМО нааран газин сурвлж татх үгән өгв.
Түүмр унтралһна церглтин көдләчнрин кварталд газин сурвлж дула өглһнә сезон эклтл орулх саната. Ода проектн-сметн документац белдгджәнә. Троицкое СМО-н администрацин толһачин үүл даажах Болдыревин келсәр, дула өглһнә кем эклтл газин сурвлж татлһна цуг көдлмш кегдх. Тегәд шин района әмтн намрин-үвлин кемд дулан гермүд үвлзх.
Ода болхла шин кварталын гермүдин эздүд сүл ясврин көдлмш күцәжәнә, газ ирхинь күләжәнә.
