Танһчин правительствин президиумин сүүр болв
Хальмг танһчд хаалһд учрдг зеткртә йовдлас көлтә әмнәсн хаһцсн улсин то сөәд йовна. Энүнә тускар танһчин правительствин президиумин сүүрт келгдв. Эн төрәр Хальмгин эрүл-менд харлһна министр Руслан Нагаев доклад кев. Энүнә келсәр, хаалһ зеткртә йовдлмудас көлтә әмнәсн хаһцсн улсин то давсн жилинәс һурвн процентд өсв. Эн жилин йисн сарин эргцд зун минһн улсин тоод хөрн зурһан йовдл болв. Нагаевин келсәр, хаалһсин бәәдл му, йоһвн улт йовдг сән хаалһ уга, хаалһст мууһар герл өггджәнә, маши залачнр болн йовһн улс хаалһар йовлһна зокал эвднә. Хаалһар йовлһна зокал эвдсн улсиг чанһ засгла харһулхш. Тер докладчикин темдглсәр нилх хорлһна то өсв. Бичкн чиннүртә төрсн нилхиг эмнүлдг дамшлт эмчнрт баһ болжана. Нагаевин келсәр, нилх бичкдүдиг боожулһна өдгә цагин эв-арһ дару-дарунь медицинск оборудовань шинрүлһиг некжәнә.
