Танһчин эмнүлин учрежденьст шин оборудовань ирв

Өөдән чинртә медицинск дөн авхин төлә ода гемтә улс талдан регионмудт одх керг уга. Эрүл-менд харлһна халх шинрүлһнә программар танһчин эмнүлин учрежденьст шин оборудовань углж тәвгдв. Энүнә дөнгәр мана регионд медицинск дөн күрглһнә туслмж ясрх зөвтә.

Күүнә давсгас чолу һарһж авдг операц ода хамгин олар кегднә. Жемуевин нертә танһчин больницд ода иим оперцаиг өдгәц агин эв-арһа кех арһ бәәнә. Энүнә төлә өдгә цагин некврлә ирлцәтә эндоскопическ оборудовань олзлгдна. Иим операцин йовудт керчлһн кегдхш. Операц кеснә хөөн гемтә күн ахр болзгт эдгнә. Тер мет шин оборудованяр больнцин талдан чигн эмчнр көдлж чаджана.

Танһчин больнцин ах эмчин дарук Анатолий Нюдиловин келсәр, иим операц гемтә улст тааста болжана. Өвдкүр угаһар керчһл келго, давсгас чолун һарһж авгдна. Энүнд шин оборудовань сән дөн болжана.

Дәкәд нег сән үлгүрнь — шин томограф. Энүнә дөнгәр күүнә цогц-махмудыг тодрха кеәвр шинжлж хәләж болх. Ода танһчин больницд иим һурвн томограф бәәнә. Давсн жилд танһчин эмнүлин учреждень зүркнә гетмә улст дөн күрглһиг ясрулһан программд орв. Эн программар өдгәц агин некврлә ирлцәтә оборудовань хулдж авхин төлә зун арвн сай арлснг йилһж өггдв. Тегәд уд луга региональн шишлнг цутхлнг экләд көдлх. Энүнд күнд гемтә улст дөн күргсн деерән, гемиг эрт илткж авлһна көдлмш кегдх. Тер мет бичкдүдин эрүл-мендин тускар бас мартсн уга. Бичкдүдин поликлиникд эрүл-менд халх шинрүлһнә программар шин медицинск оборудовань углж тәвгдв.

Бичкдүдин поликлиникин эмч-педиатр Елена Гусеван келсәр, иим оборудованя нилчәр, бичкдүдин гемиг эрт илткж авч болна. Ода эмчнрт эннь сән нилчән күргжәнә.

Зүркнә гемтә улст операц кехин төлә шин өдгәц агин навигационн оборудовань, ангиорентген, реанимационн керг-үүлдвр күцәхин төлә мобильн аппаратмуд бас бәәнә. Энүнә дөнгәр танһчин улст медицинск дөн күрглһнә туслмжин чинр ясрх зөвтә.

Хальмгин эрүл-менд харлһна министр Владимир Шовуновин келсәр, иргчэдн эрүл-менд харлһан халх шинпрүлһнә программар дәкәд чигн шин оборудовань ирх зөвтә. Тер мет танһчин райодын больницд бас иим оборудовань углж тәвгдх.

Танһчин медицинск учрежденьст болжах сән хүврлтин нилчәр, әмтнд медицинск дөн күрглһнә туслжмин чинр зөвәр ясрх зөвтә. Энүнә төлә танһчин әмтн талдан регионмудт одлго, дор ормдан кергтә дөн авч чадх.

Елена Алексенко, Хавтхна Анатолий