Танһчин царнгудт усн орулгджана

Царнгудт усн кергтә. Эндр өдрт Хальмг танһчин царнгудын ик зууднь усн орулгдв. Эн халхар Хар Һазра, Көтчнрә, Целинн болн Яшкульск райодт сән бәәдл тогтв. Танһчин селәнә эдл-ахун министерствин то-дигәр, мана регионд хөрн һурвн минһн гектарин аһуд царнгудт ус орулх кергтә. Специалистнрин келсәр, давсн жиллә дүнцүлхлә, эн жил царнгудт ус орулһна көдлмш хойр холванд түргәр кегджәнә. Болв Баһ Дөрвдә болн Октябрск райодт эн туст күнд бәәдл тогтв.

Абдул-Кадыр Кадыровин көдлмшин һол күцлнь — усн кергтә кемжәнд ирхин төлә цаглань шлюз хаах кергтә. Өдр болһн эврәннь нөкдтәһән тракторар цуг цувгудыг эргж хәләнә.

“Ставропольский” предприятин инженер Абдул-Кадыр Кадыровин келсәр, ода царнгудт ус орулжана. Эн царнгиг усар дүүргхин төлә шлюз хаах кергтә. Арвн-арвн хойр шлюз секж хаах кергтә болна. Альд усн күрсн угахинь бүрткж хәләжәнә.

Царнгудт ус орулһна көдлмшиг эдн эн жил невчк оратад январь сард эклв. Тер бийнь долан хонг болад эн аһу усар дүүрх. Усн нааран Хар Һазра магистральн цувгас иржәнә. Май сарин чилгчәр эдл-ахусин көдләчнр иим царнгудас күсдундур минһн тонн өвсн хадж авх зурата. Ут-тоодан Хар һазра районд усн орулгдх царнгудын аһу арвн минһн гектар тогтажана. Энүнә аһу Светлын Ярик царнг күртл күрчәнә. Давсн жилд энд боодг шинрүлж ясгдв. Ода энүнә дөнгәр хар һазрахн усна кемжәг бүрткж хәләж чаджана.

Хар Һазра РМО-н АПК-н делгрлтин әнгин ахлач Василий Бадаевин келсәр, Танһчин йиртмжин министерствин халхар усна сооружньс шинрүлж ясгдв. Иим сооруженьс районд кергтә. Ут-тоодан нег минһн һурвн зун минһн гектар царнгудт ус орулх кергтә. Тиигхлә эндәс күсдундур минһн тонн өвс хадж авч болх.

Баһ Дөрвдә болн Октябрьск райодт царгнудын халхар күнд бәәдл тогтв. Хар һазра, Көтчнрә, Целинн болн Яшкульск райодт усн цувгудар ирнә. Энд болхла усн царнгудт эврән һоожад иржәнә. Тегәд энүг гүүлгхин төлә насосн станц кергтә. Царнгудт болн тутрһин чекмудт усн Ижл һолас Сарпинск услврин системар иржәнә. Энүнә төлә дала мөнгн һарна. Хойр района царнгудт ус өгхин төлә танһчин бюджетас дөчн һурвн сай арслнг йилһж өгх кергтә.

Танһчин селәнә эдл-ахун министерствин заллтин ахлач Николай Очировин келсәр, Баһ Дөрвдә болн Октябрьск райодын царнгудт болн тутрһ урһадг чекмудт хйор зун тәвн йисн минһн кубическ метр усн кергтә. Энүнә төлә йилһж өгчәх электрокүчн зуг зун һучн һурвн минһн кубическ метр ус орулж болх.

Ода царнгудт иим бәәдл тогтв. Нег болн күсдундур сар болад энд нигт өвсн урһад, эргндк аһу көкрх гиж ода санж болшго. Болв энүнә төлх ик көдлмш күцәх кергтә болжана.

Елена Алексенко, Хавтхна Анатолий, Котина Валерий